Скопје, 20 јуни 2024 (МИА) - Основниот суд во Велес му определил притвор на велешанецот, кој ја удрил мајка си со бокс во главата, ја давел и ѝ се заканувал со нож дека ќе ја убие, информираат од Јавното обвинителство.

-Јавен обвинител од велешкото Основно јавно обвинителство поднел обвинителен предлог против лицето за кривично дело - „телесна повреда“ од член 130 став 2 во врска со став 1, како и „загрозување на сигурноста“ според член 144 став 3 во врска со став 2 и став 1 од Кривичниот законик. Лицето ги сторило делата при вршење семејно насилство врз сопствената мајка, соопштија вечерва од Јавното обвинителство.

На 17 јуни, по вербална расправија во домот, обвинетиот ја удрил мајка му со бокс во главата, па започнал да ја дави, нанесувајќи ѝ телесни повреди - хематоми. Зел нож од кујната со кој ѝ се заканил дека ќе ја убие.

На 19 јуни, побарал од мајката да му даде пари. Откако му рекла дека нема, повторно со нож ѝ се заканил дека ќе ја убие, со што кај неа предизвикал вознемиреност и страв.

- Јавниот обвинител до Основниот суд во Велес поднесе и предлог за определување мерка притвор за обвинетиот, кој живее во истата семејна заедница со жртвата и има можност да го повторува семејното насилство. Исто така, постојат околности што укажуваат дека тој би можел да се даде во бегство за да го избегне кривичниот прогон, се појаснува во соопштението. бд/дма/

Фото: МИА архива