• вторник, 02 јули 2024

Претседателката на Собранието на Словенија: Проблемите меѓу Косово и Србија да се решаваат со дијалог

Претседателката на Собранието на Словенија: Проблемите меѓу Косово и Србија да се решаваат со дијалог

Приштина, 1 јули 2024 (МИА) - Претседателката на Собранието на Словенија, Уршка Клакочар Жупанчич денеска во Приштина изјави дека проблемите меѓу Косово и Србија треба да се решат со дијалог за ситуацијата да не доведе до војна како во Украина. 

-Ако не ги решаваме работите преку дијалог, тогаш гледаме лоши работи како во Украина, затоа што не обрнуваме внимание на ситуации кои водат до војна. Сакам да видам како српските власти го менуваат својот став и ќе бидат поотворени, вели таа.

Жупанчич, која се сретна со претседателката на Косово, Вјоса Османи, рече дека нејзината денешна посета на Приштина придонесува за натамошно зајакнување на односите меѓу двете собранија и додаде дека Словенија продолжува да го поддржува евроатлантскиот пат на Косово.

-Сакам да ја истакнам важноста на парламентарната дипломатија. Оваа посета придонесува за натамошно зајакнување на односите меѓу двете собранија. Собранието е подготвено да сподели добри искуства поврзани со исполнувањето на критериумите за членство (во ЕУ). Словенија многу брзо ја призна независноста на Косово, ги поддржуваме вашите евроатлантски патувања, добро е тоа да го направат трети земји кои не го признаваат Косово, рече Жупанчич. мс/

фото: МИА архива

Остани поврзан