Варшава, 31 октомври 2024 (МИА) - Полска се подготвува да започне преговори за нарачка за повеќе од 100 ракетни системи за повеќекратно лансирање ХИМАРС според рамковниот договор со американскиот производител на оружје Локхид Мартин, изјави висок воен претставник.

-Во блиска иднина ќе започнеме преговори за првиот договор HOMAR-A. Имаме договор за 486 единици, а првиот договор ќе биде за над 100, изјави шефот на агенцијата за вооружување, генерал Артур Куптел, користејќи ја полската спецификација за системот M142 HIMARS.

Официјални лица од претходната влада постојано ја обвинуваа актуелната владејачка коалиција, која ја презеде власта во декември 2023 година, за одложување на купувањето оружје за Полска и за прикривање на намерите за намалување или откажување на нарачките според претходните рамковни договори по руската инвазија на Украина.

Владата на Полска соопшти дека ќе потроши 4,1 отсто од бруто домашниот производ на земјата за одбрана во 2024 година (највисоко ниво меѓу земјите на НАТО), ветувајќи дека ќе го зголеми ова на 4,7 отсто од БДП во 2025 година.

Куптел рече дека пред да започне преговорите за купување на ХИМАРС, администрацијата ќе треба да ги заврши преговорите поврзани со сличен прецизен ракетен систем нарачан во Јужна Кореја. мс/

фото: МИА архива