Отстранети две големи диви депонии во рамките на акцијата за чистење на општина Аеродром
- Во текот на претстојниот викенд ќе биде финализирана акцијата за пролетно генерално чистење на скопската општина Аеродром што ја спроведуваат Градот Скопје и јавните градски претпријатија.
Скопје, 8 април 2022 (МИА) - Во текот на претстојниот викенд ќе биде финализирана акцијата за пролетно генерално чистење на скопската општина Аеродром што ја спроведуваат Градот Скопје и јавните градски претпријатија.
Како што информираат од ЈП „Комунална хигиена“ – Скопје, во рамките на акцијата, досега расчистени се две поголеми диви депонии во оваа општина лоцирани на улицата 1619 и во реонот под Железничкиот мост, при што биле подигнати и транспортирани вкупно 126 кубни метри отпад.
Во текот на денешниот ден ќе се врши отстранување на три помали диви депонии лоцирани во близина на Транспортниот центар и на улицата Бојмија.
-Претпријатието континуирано врши и рачно и машинско метење и миење на булеварите и улиците, како и миење и дезинфекција на контејнерите и нивните микролокации. Од почетокот на акцијата, во специјалните садови што ги постави ЈП Комунална хигиена-Скопје се одложени приближно 100 кубни метри кабаст отпад што во текот на викендов ќе бидат транспортирани од страна на екипите на Претпријатието, е наведено во соопштението.свс/са/