Лас Вегас, 23 ноември 2024 (МИА) - Во Лас Вегас би можело да се реши прашањето за овогодинешниот шампион во Формула 1. Макс Верстапен (Ред Бул) ја има првата меч топка за титулата, но Ландо Норис (Мекларен) ќе се обиде барем да ја одложи промоцијата.

Норис го освои само шестото место во квалификациите, тој ќе биде во третиот стартен ред со директниот конкурент Макс Верстапен.

– Првите тројца беа недостижни. Мерцедесите беа многу брзи цел викенд, Ферари рамо до рамо со нив. Ред Бул и ние сме сериозно зад нив. Очекувавме малку повеќе, тоа е сигурно, но факт е дека се мачевме цел викенд - изјави Норис.

Доколку Норис и Верстапен ја завршат трката на истите позиции, како што ќе ја започнат утре, Холанѓанецот и математички ќе станеше шампион.

- Ќе направам се што е во моја моќ, затоа сум тука. Нема да се предадам до самиот крај, се додека има шанси за титулата. Иако се исклучително мали. Тука сум да дадам се од себе на секоја трка, без разлика дали е тоа борба за титулата или не, додаде Британецот.

Трката за ГН на САД во Лас Вегас е закажана за в недела во 7 часот по наше време. дс

Фото: Архива