Конститутивна седница на новиот состав на Парламентот во Бугарија
- Новоизбраните пратеници во 49. Народно собрание на Бугарија денеска ќе дадат заклетва на свечена седница со која ќе се отвори новиот парламентарен состав.
![Конститутивна седница на новиот состав на Парламентот во Бугарија](https://mia.mk/images/20230412081338_big_730x400_33.webp )
Софија, 12 април 2023 (МИА) - Новоизбраните пратеници во 49. Народно собрание на Бугарија денеска ќе дадат заклетва на свечена седница со која ќе се отвори новиот парламентарен состав.
Бугарскиот претседател Румен Радев во понеделникот со указ ја свика првата седница на Народното собрание за 12 април.
Според Централната изборна комисија, Парламентот ќе има 58 жени и 182 мажи, исто колку и во 48-то Национално собрание (НС). Просечната возраст на народните избраници во новиот парламент е 46 години.
Најстар пратеник повторно е Вежди Рашидов (ГЕРБ-СДС), кој според Уставот треба да ја води првата седница до изборот на постојан претседавач. Најмладиот пратеник е Георги Крастев, роден 1999 година, исто така од ГЕРБ-СДС.
На првата седница на 49. Народно собрание ќе присуствуваат претседателот Румен Радев, потпретседателката Илијана Јотова, како и вршителот на должноста премиер Галаб Донев и членови на владата.
Поканети се и претставници на Уставниот суд, на судската власт, различни државни институции, на дипломатскиот кор и верските заедници. Исто така, поканети се претходните претседатели на државата и претседателите на Националното собрание. паг/