Скопје, 6 февруари 2024 (МИА) - Премиерот на техничката Влада Талат Џафери во интервју за МИА изјави дека тој не бил пречка за избор на нов член на Државната изборна комисија (ДИК), како што сакаат тоа да го претстават партиите на Албанците во опозиција и им порачува тие да разговараат со партиите што треба да гласаат во Собранието бидејќи е потребно двотретинско мнозинство. Во однос на Изборниот законик со забелешките на ОБСЕ/ОДИХР, кој е заглавен во Собранието, вели дека доколку не се изгласа пред распишувањето на изборите следната недела, Владата ќе го разгледа драфтот од Министерството за правда и откако ќе помине на седница ќе го прати во законодавниот дом.

-Опозицијата треба да прави напори да обезбеди соодветна комуникација со политичките партии коишто одлучуваат, што имаат глас во Собранието имајќи предвид дека изборот е со двотретинско мнозинство и да престанат да се бават со расправа околу процедурата, туку треба да обезбедат на претседателот на Собранието да може да има предуслови да дојде што побрзо точката на дневен ред, што побрзо да се изјаснат пратениците за едниот предлог за да може да се добие, рече Џафери.

Во интервјуто тој не кажува зошто парламентарните партии не можат да се усогласат за Изборниот законик, но посочи дека прашање за Изборниот законик добил и на вчерашната средба со амбасадорите на ЕУ.

-Истото прашање денеска ми се постави и од амбасадорите коишто беа присутни на средбата заедничка и мојот став е до наредна седница, следната недела на Владата да чекам, значи пред распишување на избори, доколку нема предлог конкретен по однос на она што е драфтот, по претпоставка дека е усогласен затоа и го пратиле како драфт за да се дистрибуира до пратениците да го пуштат во постапка, тогаш Владата уште еднаш ќе го разгледа како материјал тој драфт, ќе го прати во Собранието во соодветна постапка и тогаш настапуваат обврските на Собранието да го донесе Изборниот законик, рече Џафери

Имајќи предвид дека од распишување до одржување избори има минимум 70 дена, смета дека е доволно време и да се донесе законот и соодветно да се постапува по одредбите од законот.

-Формално правно и со временската дистанца се има доволно време да може да се донесе законот. Така што, нема да оставиме само на фактот дека тоа е оставено на пратениците и сите да се повикуваме дека само пратениците се тие што треба да постапат. Ако не се постапи таму, ќе постапиме ние од тука и ќе ја иницираме таа работа. Значи, тоа е она што можеме да го направиме ние како Влада, рече техничкиот премиер во интервјуто за МИА.

Во продолжение го објавуваме интервјуто со техничкиот премиер Џафери во целост: 

Господине Џафери ви благодарам многу за можноста да го имаме ова интервју за МИА. Ја почнувате втората недела како технички премиер во Владата чија што главна цел е организирање на фер, демократски и слободни избори. Дали досега преземавте одредени активности коишто се поврзани со изборите и што планирате натаму?

-Прво и основно, ја почнувам втората недела како премиер на Владата и секако дека се преземени активности во смисла на организациската поставеност на Владата во целина и како состав на Владата и како администрација и административна поддршка на работата на Владата. Секако, веќе се одржани две седници како што знаете, прва конститутивна и прва редовна неделна седница на која што се поставени принципите, околностите на начинот на работа и функционирањето на седниците на Владата. Закажани се веќе две нови седници за утрешниот ден. Прва затворена седница која што треба да се бави со соодветни класифицирани податоци и информации и втора редовна седница на која што треба да се разгледаат проекции од редовното функционирање. Секако се прават подготовки по однос на тоа што е изборниот процес. Формално тоа се предактивности во очекување на распишување на изборите и секако, се прават подготовки во однос на она што е вклученост на меѓународните фактори и институции коишто имаат надлежности и интерес за следење на процесот на избори. Во тој контекст, денеска имав соодветна средба со амбасадорите на земјите членки на Европската унија за да можам да им претставам кои се активностите, со која динамика и за кои цели за да можат да имаат јасна слика и претстава за она што не’ очекува како Влада, што ни се обврските и за да можат да следат и нивни обврски и активности по однос на комуникација со Владата. Така што, тоа е сетот на подготвителни работи. Тоа не значи дека се заврши, тоа се во тек, значи со секој ден како што приближува времето за отпочнување на сите процедури формално и по распишување на избори. Во меѓувреме по распишувањето ќе добиеме и роковник од Државната изборна комисија од каде што поконкретно ќе произлезат и потреба од поконкретни активности со динамика дневна, неделна.

Кога ќе имате средба со членовите на Државната изборна комисија?

-Па јас мислам дека би требало прво, на размислување сум пред да се распишат избори да има почетна условно кажана запознавачка средба иако сме сите членови, се знаеме од претходниот период и таму да ги координираме, усогласиме активностите и надлежности кој по која надлежност и обврска што треба да прави, кога да прави за да може да  поставиме систем на комуникација и координација на надлежностите и обврските коишто произлегуваат од Изборниот законик и од Законот за Влада. Имајќи предвид дека Државна изборна комисија според закон е единствен надлежен орган за спроведување на изборниот процес, Владата според Законот за влада и Изборниот законик ја има подготвителната обврска за да подготви предуслови за да може Државна изборна комисија да ги спроведе своите активности, така што таа е комбинирана работа, надлежност и обврска и во тој контекст треба да имаме координативна средба и ќе ја имаме благовремено за да можеме да ги определиме и роковите и обврските коишто произлегуваат од таа активност.

Државната изборна комисија е се уште без еден член, а исто така во Собранието не се донесени ниту измените на Изборниот законик коишто се поврзани со забелешките на ОБСЕ и ОДИХР. Од оваа позиција сега како претседател на Владата како и дали може да влијаете да се пополни ова место во ДИК и да се донесат тие измени на Изборниот законик за да добиеме, секако, не само позитивни забелешки од страна на ЕУ и на ОБСЕ/ОДИХР, туку и да нема проблеми и сомнежи за некакви нерегуларности на изборите?

-Видете, во однос на изборот на член на Државната изборна комисија со јавните настапи на опозицијата се направи фама дека јас сум бил пречката формално. Во суштина, тоа и вие знаете во комуникацијата што сте ја имале, дека процедурите се пропишани соодветно. Она што беше мојата дејност како претседател на Собрание знаете дека ги преземав сите активности за да се исполнат обврските и роковите по однос на потребата. Оставката е надлежност на Собранието и со ова не сакам да се добива чувство дека ја префрлувам сега вината, односно одговорноста таму па сега нас не не’ интересира. Не е работа на влијание. Не треба ничие влијание да се има. Опозицијата треба да прави напори да обезбеди соодветна комуникација со политичките партии коишто одлучуваат, коишто имаат глас и во Собранието имајќи предвид дека изборот е со двотретинско мнозинство и да престанат да се бават со расправа околу процедурата, туку треба да обезбедат на претседателот на Собранието да може да има предуслови да дојде што побрзо точката на дневен ред што побрзо да се изјаснат пратениците за едниот предлог за да може да се добие.

Што е камен на сопнување во однос на Изборниот законик?

– По однос на Изборниот законик, ако се сеќавате на 4 декември беше лидерската средба организирана во Собранието и таму заклучок беше пратеничките групи да се договорат. Од Владата тогаш беше доставен драфт текст до мене додека бев во Собранието. Дистрибуиран е до сите пратенички групи и веќе се чека на пратеничките групи. Истото прашање денеска ми се постави и од амбасадорите коишто беа присутни на средбата заедничка и мојот став е до наредна седница следната недела на Владата да чекам, значи пред распишување на избори, доколку нема предлог конкретен по однос на она што е драфтот, по претпоставка дека е усогласен затоа и го пратиле како драфт за да се дистрибуира до пратениците да го пуштат во постапка, тогаш Владата уште еднаш ќе го разгледа како материјал тој драфт, ќе го прати во Собранието во соодветна постапка и тогаш настапуваат обврските на Собранието да го донесе Изборниот законик. Имајќи предвид дека од распишување до одржување избори има 70 дена минимум сметам дека е доволно време и да се донесе законот и да се постапи соодветно по одредбите од законот, така што формално правно и со временската дистанца се има доволно време да може да се донесе законот. Така што, нема да оставиме само на фактот дека тоа е оставено на пратениците и сите да се повикуваме дека само пратениците се тие што треба да постапат. Ако не се постапи таму, ќе постапиме ние од тука и ќе ја иницираме таа работа. Значи, тоа е она што можеме да го направиме ние како Влада.

Иако е кусо времето, да речам десетина дена се поминати откако сте премиер, каква е соработката со министрите од ВМРО-ДПМНЕ, со министерот за внатрешни работи Тошковски, со министерот за труд и социјална политика?

-Искрено да кажам, пред одржување на конститутивната седница јас имав една средба со министерот за внатрешни работи. Министерот за труд и социјална политика не беше присутен ниту на седница, ниту претходно. Разменивме мислења околу тоа што значи членување во Влада и обврски кон институцијата Влада и што значи спроведување на одлуките и на законите коишто произлегуваат како надлежност на министерот за внатрешни работи во овој состав. И со јасна дистинкција на она што е улогата на министер како член на Владата и што е неговото политичко право за учество во политичките дискурси, партиски активности, значи не се оспорува никакво негово учество или апсолутно, значи, неговата политичка активност во рамки на субјектот на којшто доаѓа. Впрочем и затоа е ова политичка влада. Но, се усогласивме дека она што е процедурално да се следи процедурата. Но, од конкретните однесувања на секоја седница поединечно ќе следат и конкретните одлуки на премиерот на Владата во смисла на пополнување на активностите и на обврските и на тие министерства имајќи предвид дека Законот за влада познава истоветни надлежности на министерот и на заменик-министерот во ситуација кога министерот не е во можност да учествува во работата на Владата го заменува заменикот со сите права и должности соодветно и да одлучува по односните прашања, така што во законска рамка и во контекст на она што е институционална поставеност на функциите обезбедува функционалност и присутност на сите чинители што го чинат составот на Владата и во тој контекст јас му ставив до знаење да не повторувам дека Владата нема пречки да функционира без оглед кој би бил политичкиот однос и однесувањето на поединците во составот на Владата.

Наследивте одредени проблеми како премиер, она што е прво на оваа листа секако се пасошите. Формиравте работна група. Во меѓувреме излегоа информации дека замената би можела да биде со компензација, односно со рефундирање на средствата и ред други информации, реорганизација на службите итн. Како ќе се реши овој проблем со замена на пасошите?

-Факт е дека оваа тема се отвори на првата редовна седница во Владата и во дискусијата имаше погледи, гледишта, претпоставки, предлози како би било, што би било решението. Имајќи го предвид шаренилото на погледи, чувства за потребно да се институционализира и тие погледи да може да се искажат на едно место за да се направи анализа на сите тие гледишта која би било изводлива, која не би била изводлива и на крај да излеземе со конечно решение како одлука. Но, на жалост, како што впрочем можеби била претходно воспоставена пракса, на хипотетички размислувања се излезе со евентуални решенија, па едни би биле вакви, па едни би биле, така што и во оваа прилика да укажам на членовите на Владата да не практикуваат да општат работи со јавноста коишто не се конечно решение на Владата затоа што создаваат конфузија во однос на она што би можело да биде конечно решение.

Ова се однесува и на вашиот сопартиец господинот Османи?

-Јас овде ниту ги гледам како сопартијци, ниту ги гледам поинаку. Ги гледам како членови на Влада. И работи коишто немаат конечно решение не може да бидат предмет на јавна расправа.

Ќе биде тоа на седница?

-Па мислам дека утре ќе се реферира по однос на гледиштата и она што сметаме дека е изводливо би било како одлука конечна како би се спровело, а она што би сметале дека е не спроводливо ќе треба да најдеме алтернатива кое би било решението. По однос на имањето или немањето пасоши јас не се согласува дека имаме граѓани коишто немаат пасоши коишто се надвор, оти никој не можел да се најде надвор без пасош освен ако илегално не поминал гранична линија па без документи да оди некаде низ светот. Но, и во таква ситуација, не спорам со формулацијата, но појаснувам статусно што е прашањето и под услов да имаме државјанин на оваа држава без ниеден документ надвор, а да се изјасни дека сака да дојде во државата – државата има уставна обврска да му обезбеди враќање во државата. А тоа значи државјанин на Република Северна Македонија и без ниеден документ ако дојде до граница за влез во државата – државата е должна да потврди негов статус по однос на државјанството и доколку се потврди државјанството е должна да го пушти без ниеден документ. Имајќи предвид дека од надвор не може да се патува без никаков документ, државата има воспоставено мрежа на дипломатско-конзуларни претставништва коишто имаат надлежност и обврска на таквите случаи да им издава соодветен документ за патување во еден правец за да можат народски кажано тие наши граѓани да се докопаат до институциите на државата внатре во државата и овде да се обезбеди итноста на издавањето. По однос на потребите внатре, резидентни што се во државата, да имаат потреби да патуваат мислам дека е коректно да се каже дека секој еден што има потреба да патува, планирал да патува освен во итни случаи што му е итно, непредвидено па мора денес за утре да решава, тие што планираат навремено треба и да си одат пред органите на државата. И јас извадив една статистика дневна фреквенција на барање на ниво на државата. Од прилика 10 илјади луѓе дневно имаат барања по однос на сите документи – лични карти, пасоши, возачки, сообраќајни, на ниво на државата и затоа не е пречка доколку некаде во едно подрачје е преизразена бројноста на баратели организациски институцијата треба да се постави да води евиденција и ред во смисла граѓаните да не чекаат редови на една точка, а другата точка да е празна цел ден. Да ги упатат граѓаните во соседната точка на апликација односно на поставување и извршување. Па добро, не мора да е најблискиот град. Скопје, на пример, има шест пункта. Ако Кисела Вода е толку наплив, а во Бутел или во Гази Баба која што е соседна или Центар тој што води постапка на пунктот треба да ги упати граѓаните.

Добро, сега навлеговме во детали во однос на реорганизација.

-Тоа е организациски. Значи, невозможно е нема решение. Има и ќе има решенија, а и ние ќе излеземе со конкретни решенија. Се надевам дека утре ќе имаме поконкретни решенија за сите овие прашања.

Од утрешната седница јавноста очекува исто така од Владата повторно да се упати кон Собранието Предлог-законот за рестриктивни мерки. Какви беа тие административни забелешки што требаше да се внесат во законот?

-Добро, административно прво и по однос на претставниците, дали ќе бидат исти, нема да бидат исти. По однос на дилемите коишто ги отворија во јавноста без да се гледа текстот искрено јас и не стигнав да го видам текстот таму бидејќи по надлежноста таму и немав обврска да го гледам текстот како материјален дел. По однос на статусот овде сметав дека е посоодветно да се повлече, особено што имаше, како информација имав дека внатре во составот на Влада имаше несогласување околу текстот.

Точно, таа информација излезе во јавност од Министерството за правда.

-И сега се создаде клима дека нешто се прави. Сега ако го гледаме правниот аспект можеби има проблеми, има состојби коишто не се совпаѓаат со правниот систем. Моето гледиште е политички, како политичко решение во смисла создавање предуслови за зацртување на предусловите за борбата против корупцијата и организираниот криминал. И ако тоа би требало да биде додадена вредност за напорите на државата за справување со таа појава во тој контекст е политичка одлука во смисла да се создаваат нови можности, дополнителни можности за да се спроведат правните аспекти, она што е конкретната борба и во тој контекст мислам дека е неопходно да се гледа законот, не стриктно само од правен аспект, туку и од политички контекст да се гледа работата пошироко за да ја има прифатливоста по однос на целта која што се поставува пред законот. Правниот дел, професионалниот дел, јас не би сакал да го оспорам секако фелата си има право да си ги гледа и затоа и е правната фела, меѓутоа покрај правниот аспект државата има политички обврски и можности и потреби кон граѓаните да излезе со дополнителни мерки по однос на борбата со корупцијата.

Имам информација дека Лога, министерот за правда ќе отпатува во Турција и дека неговата посета е поврзана со екстрадицијата на Палевски. Дали вие како премиер сте во позиција да споделите информација што ќе разговара во Турција министерот Лога?

-Добро, во секој случај, значи тоа е надлежност на ресорното министерство и тука нема никаква пречка и дилема и тајност во смисла на обврските што треба да ги спроведе. Министерот информира дека има потреба да се патува во странство, конкретно во Анкара. Претпоставувам дел од прашањата зошто да не ќе биде и тоа затоа што тоа е тема која што не’ засегаше сите и не’ засега сите за да земе соодветен епилог по однос на постапките, процедурите меѓународни. Така што, нема ништо тајно во смисла на она, освен процедурите коишто...

Очекувате тие разговори да ја забрзаат екстрадицијата на Палевски во Македонија?

-Па сега не сакам да прејудицирам која, што ќе биде содржината на разговорите таму. Но, во секој случај неопходна е комуникацијата директна и лична таму да се биде за да се види кои би биле постапките, процедурите, што би требало дополнително евентуално да се направи. Затоа е таа лична комуникација и е воспоставена во рамки на меѓународната соработка со соодветните братски институции со коишто соработува и со коишто соодветно имаме билатерални спогодби за комуникации.

Викендов имавме, јавно, веќе поделба во Алијансата на Албанците, денеска продолжуваат тие препукувања, има и некои нови ситуации, несакани ситуации да речам нови. Стабилна ли е владината коалиција имајќи предвид дека Алијансата на Албанците партиципира со тројца министри во Владата и имајќи предвид дека овие тројца министри се на различни страни во тој раскол во Алијанса на Албанците?

-Јас сум премиер на Владата којшто сум излегол пред Собранието со предлог за состав на Влада и Програма за работа на Влада и моите надлежности се да ја следам работата на Владата. Да констатирам дали сите членови на Владата се во рамки и во правец на исполнување на она што е програмската определба за која што овој состав добил поддршка соодветна од Собранието, секако не спорам во правото на учесниците да ги преиспитаат своите ставови по однос на учеството во Владата, така што секој еден член на Владата е слободен да се изјасни по однос на својот статус понатамошен во Владата, така што моето е да следам и во меѓувреме сходно на однесувањето и изјаснувањето и да постапувам во рамки на моите надлежности, а моја надлежност во такви ситуации како крајна е да излезам пред Собрание со други предлози и уставни надлежности коишто ми се, но во секој случај по соодветни консултации по односното прашање јас ја следам состојбата, должен сум да ја следам состојбата, не ги коментирам состојбите.

Ќе побарате ли смена на министрите? Министерот Меџити веднаш се изјасни дека е на страната на г. Таравари кој кажа дека на избори ќе оди со опозицијата, значи нема да оди со СДСМ и со ДУИ. Исто така и г. Села којшто е од другата страна рече дека Алијанса за Албанците ќе оди сама на изборите. Практично овие министри не ги поддржуваат СДСМ и ДУИ, односно оваа коалиција. Ќе побарате ли нивна смена?

-Во принцип, знаете многу одамна сум кажал, не сум Фејсбук политичар. Со оглед на тоа не сум премиер којшто се раководи со изјави по Фејсбук или не знам каде на партиски активности. Јас сум премиер на оваа Влада којшто сум го предложил составот на оваа Влада. И соодветно ќе треба да се изјаснат официјално членовите на Владата во ситуација кога имаат спротивставени ставови, да се изјаснат во институционална линија – имаат чувство на припадност на овој состав или не. Не можам да се раководам по она што ни се случува по телевизии и по конференции партиски. Така што, јас имам воспоставено комуникација, имам надлежност и на лична комуникација со министрите, со замениците истоветно им е укажано дека имаат можност на лична комуникација повратна и тие да може да комуницираат па да кажат, така што јас се раководам од институционалните процедура и постапка и со оглед на тоа ќе одлучам кој ќе биде исходот на сите овие работи што граѓаните ги слушаат по телевизии и по Фејсбук.

Политичките партии вклучувајќи ја и ДУИ многу рано годинава ја почнаа кампањата. Вашата и лична кампања и кампањата на ДУИ почна офанзивно на денот на вашиот избор, ако можам со таков воен речник да се изразам. Свесно ли влеговте господине Џафери вие и ДУИ во таков тип на кампања од самиот ден на вашиот избор со ризик да предизвикате гнев кај Македонците и кај припадниците на другите етнички заедници во земјава сакајќи да придобиете што повеќе гласови за ДУИ и да ги задржите оние ваши членови и поддржувачи?

-Прво и основно до денот на изборот и гласањето јас сум мандатар, ниту сум покренал, ниту пак сум водел кампања. Сме се нашле таму каде што ми е местото да сум во Собранието. Таму е доставен предлогот. По завршување на изборот испливот на чувство на луѓето е слобода на изразување.

Бевте следени од самото излегување од дома до патувањето до Собранието вие од камери. Во Собранието имаше новинари коишто не беа од Македонија, седеа во дипломатскиот дел. Ве прашувам за дел којшто предизвика не само кај Македонците револт, туку и меѓу Албанците?

-Проекцијата на политичко организирање е надлежност на партијата која што мислела дека така треба да се претстави како субјект. Ниту сум имал сознанија, ниту пак сум можел тоа да го спречам. И во крајна истанца, зошто би го спречил ако е тоа проекција која што секој...

Мислите дека тоа ќе и донесе многу гласови на ДУИ промовирајќи ве на таков начин?

-Тоа е израз на искажување чувства, како луѓето го доживуваат еден човек. Второ, по однос на новинарите никаде со ништо не е забрането медиуми – дали домашни ли странски да биде присутен на соодветен настан. Но, затоа е пропишана соодветна процедура. За домашните медиуми годишното акредитирање е според процедура во Собранието или акредитира претседателот на Собранието. Впрочем, вие сте еден, иако сте државна институција формирана од Собранието, но по постапка си добивате акредитација затоа што денеска сте вие, утре можеби е променет новинарот и ќе биде друг за да се знае, значи за да се има евиденција кој доаѓа кој оди. По однос на странските медиуми тие што сакаат имаат потреба и мислат дека треба да следат работа на институции во државата на годишно ниво апликациите ги прават преку Министерството за надворешни работи и одлучуваат други институции на годишно ниво. На дневно ниво како што беше случајот, дневна акредитација на странски новинари ја прави институцијата каде се одвива настанот.

Добро, би го направиле ли тоа поинаку, еве од денешна гледна точка имајќи ги предвид сите реакции наназад?

-Организациски ви кажувам не била надлежност моја како мандатар, организациски било партиска работа, побарале соодветно дозвола од Собранието, значи не е работа дошол некој од нас па упаднал во Влада. Тоа е работа на политичките партии. По однос на кампања, цел четиригодишен мандат е кампања по себе и со однесувањето во Собрание, со однесување во Влада, со однесување во други институции. Тоа е веќе недефинирано. Не можете да дефинирате што кој, кога би почнал кампања. Тоа е веќе одраз на она што сметаат според статут субјектите коишто учествуваат во политичкиот живот.

Кога СДСМ и ДУИ ќе објават дали ќе настапат со заеднички листи на изборите?

Соодветното прашање ќе имате можност по излегувањето одовде на Димитар Ковачевски претседател на СДСМ, бивш премиер, да му го поставите и соодветно на Али Ахмети како претседател на ДУИ, кој според овластувањето на партиските органи е овластен за разговори по односното прашање. Ниту имам надлежност, ниту чувствувам потреба да претпоставувам што ќе се случи.

Претпоставувам дека истиот одговор ќе ми го дадете и на прашањето дали ДУИ ќе поддржи претседателски кандидат на СДСМ?

Одговорот е ист. Не треба да претпоставите. Значи надлежноста е нивна. Јас сум премиер, јас си го водам ова, а како премиер за разлика од претседател на Собранието ќе имам можност како член на партијата да се изјаснам и одлучувам и да учествувам во одлучувањето.

Дали тогаш штрајкот во ФЗО, кратењето на средствата од платите на вработените, ќе биде на дневен ред на утрешната седница и дали воопшто Владата ќе расправа за ова прашање?

По тоа прашање не чекам утрешна влада да си дојде веќе имав координативна средба со институциите за да согледаме од каде потекнуваат причините за тоа. И секако институциите добиваат и соодветна критика зошто дошле во ситуација по пат на јавен искажан став, преку протести и штрајк, да се дојде до право коешто е стекнато со определени одлуки, и веројатно тоа е оставштина од начинот на менаџирање на соодветните институции коишто се надлежни по односните прашања. Очигледно е дека по однос на студентите што најавија, бирократското однесување на некоја институција, придонело да се има впечаток на задоцнета исплата на она што е законска определба. Што значи некој не си ја вршел својата работа навреме и тоа ќе треба да го дефинираме и соодветно човечки да се укаже првпат дека таков начин на функционирање не е дозволен и нема да го толерирам, со соодветни методи на контрола и надзор над работата на членовите на Владата и на институциите коишто се обврзани на Влада. Во однос на ФЗОМ е последица на Законот односно одлука која што ќе треба да се доразгледа одлуката во кој дел е спорна и зошто требало како резултат на одлука за методологија на определување на бодови на обезбедување на платите, за да се дефинира точно каде е изворот на тоа и таму веќе да се попречи институционалниот аспект на изворите на таков излив на незадоволство значи да сме на чисто. Значи правото на штрајк е неспорно и право обезбедено за секој, но обврска на институциите е да ги спроведат своите обврски за да не дојде до оваа последица правата да се остваруваат преку штрајк. Значи тоа што е законско да се постави систем на воспоставена можност на право и да се следи системот да се извршуваат обврски за реализација на сечие право.

Што друго можеме да очекуваме од утрешната владина седница?

Зависи од одлуките од точките коишто се предмет на расправа и од конечните одлуки по однос на спроведувањето. Така што, во принцип „не скакам пред да кажам оп“, и не се потпирам на постапки што ќе правам утре, туку известувам за завршена работа, за она што е завршено и што останува за довршување и во наредниот период да се заврши. Значи во принцип зборувам за конечни и завршени работи, а не за претпоставени работи коишто се наша обврска и надлежност. Претпоставени работи се во доменот на планирање на активностите, а завршените работи се во контекстот на известување и комуникација со граѓаните навремено да добиваат информации за она што е завршено и остварливо, а другото е планирачко што следи да се работи. Така што, ова е принципот на работа и така ќе треба да се навикнеме сите да не чекаме хипотетички претпоставени работи и активности да се најавуваат пред време.

Елизабета Велјановска Најдеска 

Фото: Фросина Насковиќ 

Видео Аслан Вишко и Андреј Бранковиќ