• среда, 17 јули 2024

ЕК: Црна Гора направи важен чекор кон ЕУ

ЕК: Црна Гора направи важен чекор кон ЕУ

Брисел, 7 јуни 2024 (МИА) - Во својата оценка, Европската комисија наведе дека, генерално, Црна Гора ги исполни привремените стандарди, постигна добар резултат на ниво на усогласеност и бележи напредок во примената на правото на Европската унија и европските стандарди во поглавја 23 и 24.

Toа се наведува во документот што го изготви Советот на ЕУ по состанокот на дипломатите од земјите на ЕУ кои се занимаваат со проширувањето, на кој се разговараше за оценката на Европската комисија и колку Црна Гора напредувала во спроведувањето на клучните поглавја во пристапните преговори поврзани со владеењето на правото. Тоа се поглавјата 23 и 24 во процесот на преговори за членство.

Привремениот репер за проценка на извештајот (ИБАР) беше доставен од Европската комисија до земјите-членки на ЕУ, кои на крајот одлучуваат за продолжување на процесот на пристапни преговори меѓу земјата кандидат и ЕУ.

Во случајот со Црна Гора, позитивен ИБАР беше неопходен за земјата да излезе од повеќегодишниот застој во процесот на преговори за членство.

Дипломатите од земјите-членки на ЕУ, во согласност со оценката на ЕК, изготвија заеднички став дека, генерално, Црна Гора ги исполни привремените стандарди. Тој став треба да го донесат амбасадорите на земјите членки.

Во документот во кој имале увид од РСЕ се наведува дека врз основа на оваа проценка, оваа привремена заедничка позиција на ЕУ ја надополнува првичната заедничка позиција на ЕУ и служи, меѓу другото, за поставување одредници за затворање на поглавјата 23 и 24 со цел да се обезбеди дополнителни насоки за идната работа. мс/

фото: МИА архива

Остани поврзан