Гургуљат, 19 ноември 2025 (МИА/БТА) – Генијалноста на бугарските команданти останува засекогаш запишана во аналите на светското оперативно искуство, а доблеста на бугарскиот војник останува како вечен симбол на храброст и самоодрекување. Копнените сили продолжуваат да го носат овој дух и да бидат ’рбетот на бугарската армија, рече бугарскиот претседател Румен Радев пред Пантеонот на загинатите во Српско-бугарската војна.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

Шефот на бугарската држава присуствуваше на прославите на воениот празник на Копнените сили, 147 години од нивното основање и 140 години од победата на славната бугарска пешадија во Српско-бугарската војна.

Радев рече дека „140 години нè делат од првата победа на бугарското оружје во нашата модерна историја“. Преку решителноста на капетаните и доблеста на нашите предци да ја бранат слободата и независноста на Бугарија по цена на своите животи, тие извојуваа брилијантна победа над надмоќниот непријател, додаде бугарскиот претседател.

Тој изјави дека не е случајно што 19 ноември, кој остана како кулминација на овие настани, е празник на Копнените сили. Тие го понесоа на своите рамена товарот на војните за национално обединување и независност и двете светски војни.

- Убеден сум дека и покрај предизвиците ќе успеете во вашата високо благородна мисија, бидејќи крвта на вашите предци тече во вашите вени, им порача Румен Радев на војниците.

Шефот на бугарската држава им честиташе на командантите за нивната амбициозна визија за развој и нивните напори за модернизација. На церемонијата беа наградени војници од Копнените сили.

Пред Пантеонот беше одржана молитвена служба, а официјалните гости положија цвеќе. Претходно во текот на денот, венци и цвеќе беа положени пред споменикот „Петте капетани“ во Сливница. Припадниците на Копнените сили маршираа во пешадиски марш „По стапките на сливничките херои“ од споменикот на капетаните до гранитниот споменик „Херои на Сливница“ во центарот на градот, каде што беа положени венци и цвеќе.

___________________________________________________________________________________________________________________________________

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.