Делчево, 14 август 2024 (МИА) – Во тек е пријавувањето за учество на традиционалниот младински летен камп во Делчево. Кампот е во организација на Регионалниот центар за застапување годинава и ќе се реализира во рамки на проектот „Надвор од границите – обединети за промена“. Активностите на кампот како што информираа од Регионалниот центар за застапување ќе бидат со фокус на развивање на знаења, вештини и способности за гаснење пожари.

- Оваа година кампот ќе се одржи на 26-27 август 2024 година на комплексот Езерце Сандански со концепт како и претходните кампови – ноќевањето е во шатор и сите предвидени активности ќе се одвиваат на отворено. Во однос на активностите тие ќе бидат со фокус на развивање на знаења, вештини и способности за гаснење пожари, со учество на професионални пожарникари и претставници на доброволни противпожарни друштва од регионот, истакнаа од РЦЗ.

Поради екстремните временски појави последните години во нашиот регион се создаваат услови за шумски пожари и пожари на отворено во последните 3 години. За да се ублажат сите негативни влијанија, ова според организаторите е многу важна тема за конкретни чекори во заштитата на животната средина и здравјето на луѓето особено за младите.

- Преку оваа сесија учесниците на кампот ќе стекнат увид и интерес да станат доброволни членови на полето на итни служби. Ќе развиваат лидерски вештини и ќе добијат поддршка од професионалци со цел да станат корисни членови во локалната заедница. Тие, исто така, ќе се здобијат со зголемена свест за волонтирање и/или кариера во противпожарните/итни служби. Меѓу другото во рамки на кампот ќе се одржуваат и рекреативни активности, ќе се спортува, вежба јога, ќе се подготвуваат рачни изработи, ќе се готви и сл, додадоа од Регионалниот центар за застапување од Делчево.

Поради ограничената бројка на учесници изразија охрабрување до сите млади од регионот на возраст од 15 до 30 години да се пријават преку регистрација на линкот објавен на веб страницата на РЦЗ, при што транспортот, храната, камперската опрема и материјалите за сесиите се обезбедени од страна на организаторот.

Проектот е финансиран од Амбасадата на САД во Скопје. вс/ир

Фото: МИА