Кавадарци, 21 октомври 2023 (МИА) - „Сееме семе на промени, жнееме надеж за поздрава животна средина" е насловен проектот што денеска почна да се спроведува во Средното земјоделско - шумарско училиште „Ѓорче Петров" во Кавадарци. Од училиштето информираа дека проектот е финансиран и поддржан од Фондацијата „Отворено општество". 

- Имаме неколку стратешки цели за оваа обука. Да ги запознаеме идните земјоделци, шумари и здравствени работници со правилата и регулативите на зелена агенда на Западен Балкан, како идни носители на овие дејности. Проектот трае шест месеци, на агендата се теоретски и практични обуки и форум за пошироката јавност, особено за земјоделците, ќе биде укажано на примената на лоши земјоделски практики и колку тие штетно влијаат на животната средина, да се подигне свеста и да се запознаат земјоделците со правилата и регулативата на зелената агенда на Западен Балкан, велат од средното училиште. 

Во делот на практичната обука, како што објаснија, ќе се произведе органски компост од суровина од виното и од лозјата, кој ќе биде однесен на лозовите насади на училиштето за ѓубрење. 

Предаваат стручни лица од училиштето, а проектот го спроведува здружението „Нова Цивиста“, во партнерство со училиштето и две винарски визби од Кавадарци. свд/мч/

фото : Фејсбук на Земјоделско - шумарско училиште Кавадарци