Во Делчево започна дводневна работилница од прекуграничниот проект за градење капацитети на еко-системските услуги
- Во Делчево започна дводневна работилница како дел од прекуграничниот проект за градење капацитети на еко-системските услуги од страна на локалните заедници во планинските региони во Македониј
![Во Делчево започна дводневна работилница од прекуграничниот проект за градење капацитети на еко-системските услуги](https://mia.mk/images/20221108004307_big_730x400_99.webp )
Делчево, 4 јули 2021 (МИА) - Во Делчево започна дводневна работилница како дел од прекуграничниот проект за градење капацитети на еко-системските услуги од страна на локалните заедници во планинските региони во Македонија и Бугарија.
Проектниот координатор, Миран Митревски, истакна дека целта на проект како краен производ е да направиме стратегија на еко-системски услуги на Осоговските планини.
- Еколошкото друштво веќе работи на стратегијата на Осоговските планини. Населението ќе добие насока како да ги користи еко-системските услуги бидејки нашите планини се богати со природни диви овошја, треви за чаеви, што од една страна ќе придонесе да се развие турзимот, а од друга страна за развивање на семејниот бизнис. Значи обуката во Делчево во овие два дена е токму во таа насока, како обука за користење на еко-системските услуги на Осоговските планини, а во понатамошната фаза планираме да направиме уште една стратегија за еко-туризам, рече Митревски.
Фокусот на проектот, како што додаде, е основно на еко-системските услуги во заштитените територии во двете земји.
- Општото кое треба да не обедини е поврзано со целите на проектот преку градење на капацитети во врска со стратегијата и добрите практики за искористување на материјалните добра како дел од самите еко-системи кои се вклучени во проектот. Ние од Институтот за шуми сме задоволни што ќе бидеме дел од проектот и се надеваме дека резултатите кои ќе ги добиеме ќе бидат од полза за сите, истакна претставниката на Шумарскиот институт од Република Бугарија.
Во рамки на проектот предвидено е и изготвување на анализа на влијанието на климатските промени и употребата на земјиштето врз ресурсите и услугите на планинските екосистеми во прекуграничниот регион која се очекува да развие долгорочна стратегија за зајакнување на интеграцијата на концептот на еко-системски услуги во мрежата на заштитени области и територијален развој на планинските области.
Водечки партнер во прекуграничниот проект е Агенција за локален економски развој - Разлог, со партнерство на Шумарски Институт - Бугарска академија на науките и еколошкото друштво Здравец 2002, Македонска Каменица. вс/ар/
![](/articles/images/vo-delchevo-zapochna-dvodnevna-rabotilnica-od-prekugranichniot-proekt-/19aUCy9kD/placeholder.webp?use_watermark=0)
![](/articles/images/vo-delchevo-zapochna-dvodnevna-rabotilnica-od-prekugranichniot-proekt-/urekF3HEE/placeholder.webp?use_watermark=0)