Скопје, 13 февруари 2024 (МИА) – На 3.200 вработени во УКИМ ќе им бидат зголемени платите. Ова е исходот од денешната средба меѓу министерот за труд и социјална политика Ѓоко Велковски со ректорката на УКИМ Биљана Ангелова и претставници на синдикатот.

Од МТСП соопштуваат дека на средбата се дошло до решение за признавање на поединечниот колективен договор на УКИМ, а со тоа и зголемување на нивните плати.

- Ги повикувам ресорните министерства, Министерството за образование и наука и Министерството за финансии да изнајдат брзо решение за признавање на колективниот договор и зголемување на платите на вработените во Универзитетот, изјави Велковски.

Во врска со надлежноста на МТСП, од ова министерство ја информираат јавноста дека се работи за поединечен колективен договор, за којшто потписниците, согласно член 231 став 3 од Законот за работни односи имаат обврска да го известат министерството за неговото потпишување, што во конкретниот случај е и направено.

- Бидејќи потписниците на колективниот договор склучен помеѓу Собранието на РСМ и УКИМ постапиле согласно предвиденото во Законот, по однос на ваквиот вид на договор, МТСП смета дека нема правна пречка во однос примената и понатамошно постапување по истиот, истакнуваат од МТСП. ир/са/

Фото: МТСП