Делчево, 14 август 2024 (МИА) - Млади волонтери од Црвен крст Делчево делеа шишиња вода на граѓаните низ градските улици, со цел нивно разладување од високите температури. Активноста како што информираа од Црвен крст е дел од препораките за заштита на населението од топлотниот бран во државата.

-Волонтерите при Клуб на млади на Црвен крст на РСМ Општинска организација Делчево продолжуваат со активностите за време на топлотниот бран. Согласно препораките на надлежните институции, а како дел од системот за одговор и дејствување при катастрофи и здравствено превентивно дејствување тие делат шишиња со вода на најфрекфентните локации во градот, истакнаа од Црвен крст Делчево.

Овие активности како што додадоа ќе се извршуваат се додека трае топлотниот бран.

-Апелираме на почитување на препораките од надлежните да не се излегува на топлото време без потреба. Сепак доколку имаат потреба нека не побараат на дежурниот телефонски број или во нашата канцеларија во центарот на градот, додадоа од Црвен крст Делчево.

Претходно акција за делење на шишиња со вода беше спроведена на Градскиот пазар во Делчево. вс/

Фото: МИА