Скопје, 1 декември 2025 (МИА) - Музејот на современата уметност на Црна Гора на 11 декември во 19 часот ќе ја отвори меѓународната изложба Museum Yet to Be, кураторски обликована од Милица Безмаревиќ , Музеј на современа уметност – Црна Гора, Јованка Попова, Музеј на современа уметност - Скопје и Мишела Блануша, Музеј на современа уметност - Белград.

Изложбата ги согледува музеите како флуидни, променливи простори кои одговараат на немирните текови на современото општество и ги рефлектираат неговите трансформации.

Почетната точка на проектот е сегашниот момент исполнет со политички поделби, постојано насилство и нестабилни социо-економски околности.

Македонските уметници Јане Чаловски и Христина Иваноска ќе бидат претставени со колаборативното дело „Еднаквост“, кое ги обединува концептуалниот текст на Ad Reinhardt и графичкиот дизајн на Bridget Riley.

Нивното дело се состои од шест рачно ткаени ленени панели со вез, графит и текстилна боја, кои претставуваат долгорочно истражување на односот меѓу текстот, визуелната структура и материјалноста. Рајнхардовиот текст функционира како конкретна поема со тон на итност, кој силно кореспондира со темите присутни во нивната практика: институционална критика, контекстуализација на уметничкото производство и личната политика. 

Изложбата Museum Yet to Be замислува свет обликуван од правичност, свет во кој се преиспитуваат моделите на институционално управување, се негува активно слушање во музејската заедница и се делува внимателно во променливи контексти, без компромис по однос на етичноста. Преку уметничките практики се поставуваат прашања за тоа како да се воспостави лична врска со еманципаторските наследства на минатото, како внимателно да се историзира сегашноста и на кој начин овие пристапи можат да ја обликуваат иднината.

Во изложбата, покрај Јане Чаловски и Христина Иваноска учествуваат 33 меѓународни уметници и колективи: Cem A, Noor Abuarafeh, Basma al-Sharif, Kader Attia, Noorafshan Mirza & Brad Batler, Dante Buu, Yane Calovski & Hristina Ivanoska, CATPC, Ali Cherri, Keti Chukhrov, Jasmina Cibic, Coco Fusco & Guillermo Gómez-Peña, Aldo Giannotti, Igor Grubić, Adrijana Gvozdenović, Terike Haapoja & Laura Gustafsson, Vladan Jeremić & Rena

Rädle, Nikita Kadan, Šejla Kamerić, Irena Lagator Pejović, Renzo Martens, Palestinian Museum, Mladen Miljanović, Ahmet Öğüt, Dan Perjovschi, Darinka Pop-Mitić, Roma Jam Session, Driton Selmani, Jonas Staal, Saša Tkačenko, Jelena Tomašević, Anton Vidokle и Ala Younis.

Преку нивните дела, музејот се трансформира во простор на средба и зона на контакт, каде значењата се преобликуваат, вредностите се преиспитуваат, а различни етички визии за иднината почнуваат да се исцртуваат. 

Изложбата дополнително ја истражува флексибилноста и релевантноста на современите етички рамки, разгледувајќи го нивниот потенцијал да насочат или инспирираат нови форми на институционалност. свс/са/

Фото:  Јована Попова