Shkup, 16 prill 2025 (MIA) - Në Maqedoni aktualisht janë mbi 200 pacientë të cilët presin për transplant organi. Kjo listë është dinamike dhe vazhdimisht ndryshon, theksoi prof. Biljana Kuzmanovska, koordinatore nacionale për transplantim, në konferencën e sotme për media në Ministrinë e Shëndetësisë.

"Me këtë transplantim të fundit kadaverik, të suksesshëm, ku të gjithë pacientët u lëshuan në shtëpi në një periudhë shumë të shkurtër kohore - të dy pacientët që kanë marrë veshkë dhe pacienti që ka marrë mëlçi, kanë ruajtur kockat dhe ligamentet, indet në bankën e kockave, duke i shtuar një numër tjetër statistikave të transplantit. Por, qëllimi i konferencës së sotme për media nuk është vetëm të informohet se statistikat e transplanteve në Maqedoni janë në rritje, por edhe të theksohet rëndësia e dhurimit të organeve dhe rëndësia e transplantit. Pas çdo statistike fshihen jetë, histori shprese, histori dhimbjeje dhe fatkeqësisht ndonjëherë edhe histori për humbje personale", theksoi Kuzmanovska.

Kompetentët në konferencën e sotme për mediat informuan për dy ndërhyrje të komplikuara të kryera në Klinikën për Kirurgji Digjestive në Shkup.

Drejtori i Klinikës për Kirurgji Digjestive, Ognen Kostovski tha se më 12 dhe 13 mars janë kryer transplante kadaverike të mëlçisë dhe dy veshkave.

Pak më vonë, me mbështetje financiare, u krye procedura e parë bariatrike tek një pacient. Hospitalizimi total zgjati dy ditë.

"Ky është transplanti i pestë kadaverik i mëlçisë me rezultatin më të suksesshëm", nënvizoi Kostovski.

Ai tha se trendi vazhdon dhe se në të ardhmen do të bëhen të gjitha përgatitjet për fillimin e procesit të transplantit nga dhuruesi i gjallë.

Kënaqësi nga ngjarja e sotme shprehu edhe ministri i Shëndetësisë Arben Taravari.

"Me këtë rast, si akti më i lartë i humanizmit, dua të falënderoj familjet që në momentet më të vështira të humbjes tregojnë madhështi dhe humanizëm, falë të cilit shpëtohen jetë njerëzore apo përmirësohet cilësia e jetës së pacientëve", tha ministri.

Ai po ashtu falënderoi të gjithë punonjësit e shëndetësisë.

"Me këtë rast dëshiroj të theksoj se jemi të fokusuar në mënyrë të veçantë në edukimin dhe ngritjen e njohurive, si dhe janë planifikuar risi në fushën e transplantimit", tha ministri. sa/

Foto: MIA