Shkup, 1 prill 2025 (MIA) - Zëvendëskryeministri i Maqedonisë së Veriut për Politika të Qeverisjes së Mirë, Arben Fetai, mori pjesë sot në Dialogun Rajonal mbi Politikat e Qeverisjes së Mirë dhe Lidershipin e Grave në Evropën Juglindore, organizuar në Sarajevë nga Nisma Rajonale Kundër Korrupsionit.

 Siç sonte informojnë nga Kabineti i tij, Fetai theksoi rolin vendimtar të grave në qeverisje, duke nënvizuar se lidershipi i tyre forcon transparencën, llogaridhënien dhe vendimmarrjen inkluzive.

 “Lidershipi i grave nuk ka të bëjë vetëm me përfaqësimin, por me gjithëpërfshirjen, qeverisjen etike dhe aftësinë për t'u përballur me sfidat. Burrat në pozita drejtuese nuk duhet të jenë vetëm mbështetës pasivë, por aleatë aktivë në sfidimin e stereotipeve, krijimin e mundësive dhe nxitjen e ndryshimeve sistemike,” ka theksuar Fetai.

Ai shtoi se barazia gjinore nuk është vetëm një çështje formale, por një forcë lëvizëse për qeverisje më të mirë.

"Duke integruar barazinë gjinore në politikat publike, duke garantuar llogaridhënie dhe duke ndërtuar një kulturë udhëheqjeje gjithëpërfshirëse, mund të krijojmë institucione që u shërbejnë të gjithë qytetarëve", theksoi Fetai. 

Foto: Kabineti i Arben Fetait