Мадрид, 15 октомври 2024 (МИА) – Шпанската полиција заплени 13 тони забранети хемикалии, меѓу кои и можен материјал за производство на хемиско оружје. Хемикалиите биле наменети за Русија и покрај санкциите воведени кон Москва поради војната во Украина.

Приведени се и четири членови на криминален синџир, кој илегално ја снабдувал Русија со хемиски производи преку лажна компанија управувана од „граѓани со руско потекло“.

- Во текот на истрагата беше докажано дека меѓународно санкционирани хемикалии, некои од нив можен материјал за хемиско оружје или нервни агенси, во минатото биле извезени преку таа компанија, се посочува во заедничкото соопштение на шпанската полиција и даночната управа.

Во соопштението не е прецизирано кои хемикалии се запленети во последната операција.

Хемикалиите биле пронајдени во контејнер во пристаништето во Барселона, додека четворица осомничени биле уапсени во околните села. Тие се соочуваат со обвиненија за континуиран шверц на забранети стоки. ми/

фото: МИА архива