Охрид, 18 февруари 2025 (МИА) – Олеснување на пристапот на граѓаните до јавните комунални услуги е целта на Форумот што го организира Општина Охрид, а се одржа во рамки на проектот „Заедно со потрошувачите во дигитализација и модернизација на јавните комунални услуги во Општина Охрид“.

Како што истакна Татјана Тасевска од Организацијата на потрошувачите на Македонија (ОПМ), собирот што се одржува согласно договор со Институтот за европски политики е во насока на дигитализирање на јавните комунални услуги, во смисла олеснување на пристапот на граѓаните кон општинските инстутуции.

- Во овој момент нема можности граѓаните непосредно преку веб-страница или апликација да реагираат на неправилности, да поднесат потрошувачки приговори и за истото да добијат одговор...Тие барања треба да може да се поднесуваат електронски и Општината врз основа на тие барања да реагира, рече таа.

Во рамки на Форумот беа презентирани и резултатите од истражувањето спроведено за да го покаже нивото на задоволството на граѓаните од услугите на јавните комунални претпријатија на Општина Охрид.

Од опфатените околу 200 испитаници со анкетата, некаде оценката за достапоноста на комуналните услуги оценката е некаде тројка, на скала од еден до пет.

- Има задоволство во одредени сегменти, но и многу работи за кои граѓаните сметаат дека има простор за нивно подобрување, ги коментираше Тасевска. резултатите од анкетата.

До Канцеларијата за поплаки на Општина Охрид минатата година имало 112 обраќања на граѓани, претежно доставени по електронска пошта или преку телефон.

Вангел Спироски од Советот на потрошувачи на Општина Охрид смета дека има место за подобрување на услугите, преку подигање на нивното на комуникацијата со граѓаните, поголема ажурност на службите во реакцијата на одредени забелешки или поплаки.

- Заради тоа се и законските измени во легислативата насоена кон заштита на потрошувачите. Кога некој потрошувач поднесе приговор, мора во рок од 15 дена да добие одговор, а мора и да се води статистика во јавните претпријатија по однос приговорите...Сите приговори на граѓаните имаат своја завршница, но сепак мора да се овозможи секој граѓанин точно да знае каде треба да се обрати за да добие одговор, рече Спироски.

Професорот Ристо Речкоски како надворешен соработник на ОПМ и Организацијата на потрошувачи на Општина Охрид, рече дека постојното законодавство по материјата е целосно усогласено со она на ЕУ, но истражувањето укажува на потреба од дигитални апликации преку кои би се забрзало доставувањето приговори и нивно решавање.

- Некаде половина од самите претпријатија нудат такви можности, но тоа не се доволно софистицирани канали на комуникација. Она што треба е да се развиваат поедноставни начини на поднесување приговори, а секако треба да се работи и на едукација на самите граѓани за нивните права и заштита како корисници на јавните сервиси, рече тој.

На Форумот се очекува да произлезат конкретни насоки и сугестии за подобрување на електронската достапност на административните постапки за комуналните услуги во Општина Охрид.

Проектот се реализира преку шема за доделување мали грантови од областа на реформата на јавната администрација во рамките на проектот WeBER 3.0, финансиран од Европската унија и кофинансиран од Австриската Развојна агенција. аб/нд/

фото/МИА