Стопанската комора почнува соработка со УГД Штип, предвидена поддршка за компаниите да го усвојат принципот на циркуларна економија
- Компаниите ќе може да ги користат лабораториите, истражувачката инфраструктура на Универзитетот, како и научните и стручните експертизи за меѓународните стандарди за заштита на животната средина.
![Стопанската комора почнува соработка со УГД Штип, предвидена поддршка за компаниите да го усвојат принципот на циркуларна економија](https://mia.mk/index.php/images/20240130153321_big_730x400_16.webp )
Скопје, 30 јануари 2024 (МИА) - Стопанската комора почнува конкретна соработка со Универзитетот „Гоце Делчев“ (УГД) - Штип во делот на зелената и циркуларната економија. Преку овој проект компаниите ќе може да ги користат лабораториите, истражувачката инфраструктура на Универзитетот, како и научните и стручните експертизи за меѓународните стандарди за заштита на животната средина.
-Почнуваме со поддршка на компаниите во воведувањето на концептот на циркуларна економија и креирање нови, иновативни производи со реупотреба на материјали и имплементирање стандарди за заштита на животната средина, рече претседателот на Комората Бранко Азески.
Според ректорот на УГД Дејан Мираковски, проектот циркуларна и зелена економија е финансиран во рамки на Програмата за колаборативни проекти на Министерството за економија.
-Целта е да изградиме платформа за долгорочна соработка меѓу науката и бизнисот токму во делот на новите трендови како циркуларната и зелената економија и да обезbедиме поддршка за имплементација на овие решенија во домашната индустрија, истакна ректорот.
Предвидено е да се формираат два меѓусебно поврзани центри - бизнис центар во Комората и научно-истражуачки центар во рамки на УГД. Организирани ќе бидат и технички обуки за фирмите како поддршка да воведат поголема заштита на животната средина.
Стопанската комора веќе почна серија разговори со државните универзитети и работи на платформи и прoграми за соработка, со цел, како што рече Азески, науката да се стави во функција на бизнисот. мч/лв/
фото: Стопанска комора