Вашингтон, 16 октомври 2024 (МИА)  - Американскиот бизнисмен, милијардерот Илон Маск, вложил околу 75 милиони долари во организација што ја создаде за поддршка на поранешниот претседател на САД, Доналд Трамп, кој е републикански кандидат за претседател на изборите во 2024 година. Овие донации, кои синоќа беа јавно објавени преку федерално соопштение, покажува дека Маск станал клучен дел од напорите на Трамп да победи на претседателските избори на 5 ноември против демократскиот кандидат Камала Харис, како и перзистентното влијание на мега-донаторите во американската политика.

Донaциите на Маск за групата America PAC го воведоа во ексклузивниот клуб на републиканските мега-донатори, предводени од банкарскиот магнат Тимоти Мелон и милијардерката од казино-индустријата Миријам Аделсон.

Говорејќи со деничарскиот водител Такер Карлсон претходно овој месец, Маск изјави дека ја создал групата, позната како политички акционен комитет или PAC, за да „ги поддржи основните вредности во кои верувам“. Групата, наречена America PAC, ги опишува тие вредности како стремеж кон обезбедени граници, разумно трошење, безбедни градови, праведен правосуден систем, слобода на говор и самоодбрана.

Маск — кој ги поседува компаниите Тесла, социјалната платформа Икс и аерокосмичката компанија SpaceX — се смета за еден од најбогатите луѓе во светот.

Претприемачот роден во Јужна Африка јавно ја изрази поддршката за Трамп во јули, по обидот за атентат врз него во Батлер, Пенсилванија. Подоцна, Маск му се придружи на Трамп на предизборниот пат кога Трамп повторно се врати во Батлер за нов митинг во октомври.

„Како што можете да видите, јас не сум само МАГА. Јас сум темен Мага,“ рече Маск тогаш, покажувајќи на својата црна капа „Make America Great Again“.

Говорејќи на митингот во Батлер, Маск изјави дека демократите сакаат „да ви ја одземат слободата на говор, да ви го одземат правото да носите оружје, и ефективно да ви го одземат правото на глас“. Трамп редовно ја спомнува поддршката на Маск на предизборните настапи, а исто така вети дека ќе го именува Маск да води ново осмислена комисија за ефикасност на владата ако повторно ја освои Белата куќа во ноември.

Се наведува дека America PAC потрошила 87 милиони долари на кампањата до 9 октомври, главно инвестирајќи во мобилизација на гласачи и активности за кампања во клучните држави Пенсилванија, Мичиген, Северна Каролина, Висконсин, Џорџија, Невада и Аризона.

Како резултат на пресудата на Врховниот суд од 2010 година во случајот Citizens United, корпорациите добија можност да трошат неограничен износ на политички активности за поддршка на кандидатите, се додека не координираат директно со кампањата.

Претходно, корпорациите беа ограничени во тоа колку можат да потрошат за да помогнат на некој кандидат. Но, пресудата Citizens United го отвори патот за создавање на супер PAC-ови, кои — за разлика од традиционалните PAC-ови — немаат ограничување на собирањето средства.

Трошоците во американските избори оттогаш нагло пораснаа. Пресудата, исто така, донесе пораст на таканаречените „темни пари“, каде што поединци можат да ги прикријат своите изборни трошоци преку компании што донираат на супер PAC-ови. Организацијата OpenSecrets, која ги следи политичките активности, предвидува дека рекордни 15,9 милијарди долари ќе бидат потрошени на федералните избори во 2024 година. Тоа ќе ги надмине 15,1 милијарда долари потрошени за време на изборниот циклус во 2020 година — иако, прилагодено за инфлација, таа сума би изнесувала околу 18,3 милијарди долари во денешни услови.

OpenSecrets исто така извести дека надворешното трошење за кампањи — вклучувајќи го и America PAC на Маск — значително ги надминува претходните изборни циклуси.

Надворешните групи досега потрошиле речиси 2,6 милијарди долари оваа година, а има уште еден месец до изборите. Тоа е речиси милијарда повеќе отколку во истиот период во 2020 година.

OpenSecrets наведе дека надворешното трошење годинава ја фаворизирало конзервативната страна, што претставува обратен тренд од минатата година, кога либералите добија повеќе. ссм/

фото: ЕПА