Се очекува отворање на граничниот премин од Египет кон Газа
- Се очекува повторно да се отвори граничниот премин кон Газа контролиран од Египет по дипломатските напори да се донесе помош во појасот, што е под интензивно израелско бомбардирање по нападот на милитантите на Хамас на 7 октомври.
![Се очекува отворање на граничниот премин од Египет кон Газа](https://mia.mk/index.php/images/20231016071257_big_730x400_38.webp )
Газа, 16 октомври 2023 (МИА) - Се очекува повторно да се отвори граничниот премин кон Газа контролиран од Египет по дипломатските напори да се донесе помош во појасот, што е под интензивно израелско бомбардирање по нападот на милитантите на Хамас на 7 октомври.
Стотици тони помош од неколку земји со денови се на египетскиот полуостров Синај, чекајќи договор за безбедна испорака во Газа и евакуација на сопственици на странски пасоши преку преминот Рафах.
-Рафах ќе биде повторно отворен. Воспоставуваме механизам со Обединетите нации, со Египет, со Израел, со другите, со кој ќе добиеме помош и ќе ја доставиме до луѓето на кои им е потребна, изјави американскиот државен секретар Ентони Блинкен по синоќешната средба со египетскиот претседател Абдел Фатах ал Сиси.
Блинкен не го прецизираше времето на повторното отворање на преминот.
-Ветеранот на американскиот дипломат Дејвид Сатерфилд, назначен во недела за специјален пратеник за хуманитарни прашања на Блискиот Исток, ќе пристигне во Египет денеска за да ги разработи деталите, објави Блинкен.
Израел ги повика исцрпените жители на Газа да се евакуираат на југ, што стотици илјади веќе го направија во опколената енклава со повеќе од 2 милиони луѓе. Хамас, кој управува со Газа, им порача на луѓето да ја игнорираат пораката на Израел.
Резервите на гориво во сите болници низ Појасот Газа се проценува дека ќе траат околу 24 часа, ставајќи во опасност илјадници пациенти, соопшти денеска Канцеларијата за хуманитарна помош на Обединетите нации (OCHA).
Властите во Газа објавија дека досега во израелските одмазднички напади се убиени најмалку 2.670 луѓе, од кои четвртина се деца, а речиси десет илјади се ранети. Уште илјада луѓе се водат како исчезнати и се верува дека се под урнатините.
Претставници на американската влада велат дека се мобилизираат за да помогнат во олеснувањето на хуманитарната криза во Газа, очекувајќи брутална копнена офанзива. мс/
фото: ЕПА