Скопје, 23 ноември 2024 (МИА) - Во Националната и универзитетска библиотека „Св. Климент Охридски“ во Скопје денеска напладне ќе биде одбележан јубилејот - 80 години од именувањето на првиот директор и започнувањето со работа на библиотеката во слободна Македонија со заповед на Поверенството за народна просвета на Президиумот на АСНОМ на 23 ноември 1944 година.
 
Од НУБ „Св.Климент Охридски“ најавија дека обраќања по повод јубилејот  ќе имаат претседателката Гордана Сиљановска-Давкова, в.д. директорот на Јовица Никчевски и државниот секретар во Министерството за култура и туризам Марија Ѓоргова.
 
Прославата ќе биде збогатена со настап на националниот ансамбл „Танец“, со изведба на неколку музичко-фолклорни композиции од машка и од женска пејачка група со придружба на дел од оркестарот на традиционални инструменти.
 
НУБ „Св. Климент Охридски“ ќе додели благодарници на Министерството за култура и туризам, на националниот фолклорен ансамбл „Танец“ и на соработници на библиотеката, а постхумно ќе биде доделена благодарница за првиот директор Георги Шоптрајанов што ќе ја прими претставник од семејството.
 
На одбележувањето премиерно ќе биде прикажана видео презентација на која е претставен историјатот и развојниот пат на библиотеката, а исто така ќе биде отворена и изложба на оригинални документи, копии верни на оригиналите и други материјали поврзани со историјатот на НУБ „Св. Климент Охридски“ - Скопје.лв/вг/

фото: НУБ „Св. Климент Охридски“ - Скопје