Руски лекари му напишаа отворено писмо на Путин во кое го повикаа да овозможи Навални да се лекува
- Руски лекари објавија отворено писмо до рускиот претседател Владимир Путин во кое бараат да му се укаже третман на опозицискиот лидер Алексеј Навални, кој се разболе во затвор, јави ДПА.
![Руски лекари му напишаа отворено писмо на Путин во кое го повикаа да овозможи Навални да се лекува](https://mia.mk/index.php/images/20231210133400_big_730x400_87.webp )
Москва, 10 декември 2023 (МИА) - Руски лекари објавија отворено писмо до рускиот претседател Владимир Путин во кое бараат да му се укаже третман на опозицискиот лидер Алексеј Навални, кој се разболе во затвор, јави ДПА.
Во писмото, потпишано од повеќе од 100 руски лекари денеска до пладне, се наведува дека одбивањето да се обезбеди лекување на Навални го прекршува рускиот Устав.
Во меѓувреме, медиумите објавија и дека драстично е влошено и здравјето на политичарот Алексеј Горинов од Москва, кој беше првиот што се спротивстави на војната против Украина и беше осуден за дискредитација на руската војска.
Во 2022 година, Горинов беше осуден на седум години затвор, откако на седница на московскиот парламент повика на минута молчење за „жртвите на воената агресија во Украина“.
Горинов (62) сега се соочува со нови обвиненија за „оправдување тероризам“, бидејќи разговарал со други затвореници за војната.
Според неговите адвокати, Горинов, кој има хронично белодробно заболување, веќе боледува од акутен бронхитис. „Алексеј нема сила ни да седи на стол и да разговара. Падна неколку пати“, рече неговиот адвокат, истакнувајќи дека затворските власти одбиле лекување за неговиот клиент. ссм/
фото: архива