Регионалниот лидер на десничарската АфД обвинет за употреба на нацистички слоган
- Обвинителството во Германија денеска соопшти дека поднело второ обвинение против регионалниот лидер на екстремно десничарската партија Алтернатива за Германија (АфД), Бјорн Хоке, поради изговарање парола што ја користеле нацистичките јуришници СА на политички настан.
![Регионалниот лидер на десничарската АфД обвинет за употреба на нацистички слоган](https://mia.mk/index.php/images/20240403174226_big_730x400_96.webp )
Берлин, 3 април 2024 (МИА) - Обвинителството во Германија денеска соопшти дека поднело второ обвинение против регионалниот лидер на екстремно десничарската партија Алтернатива за Германија (АфД), Бјорн Хоке, поради изговарање парола што ја користеле нацистичките јуришници СА на политички настан.
Тој веќе требаше да се појави пред судот во градот Хале во германската покраина Саксонија-Анхалт под обвинение дека користел симболи на неуставни организации.
Хоке, кој е регионален лидер на АфД во Тирингија, беше обвинет дека го завршил говорот во Мерзебург во мај 2021 година со зборовите „Сите за Германија!“. Обвинителството тврди дека тој знаел дека тоа е слоганот на германската СА, паравоена организација на Нацистичката партија која одиграла клучна улога во доаѓањето на Адолф Хитлер на власт.
Неговите адвокати негираа дека неговите зборови имаат некаква „криминална важност“. Во новиот случај, обвинителството тврди дека тој го повторил слоганот на митинг на АфД на 12 декември во градот Гера во неговата родна држава Тирингија.
Огранокот на АфД во Тирингија, на чело со Хоке, домашната разузнавачка агенција на Германија го смета за „докажана десничарска и екстремистичка“ група.
Хоке еднаш го нарече споменикот на Холокаустот во Берлин „споменик на срамот“ и ја повика Германија да направи „пресврт од 180 степени“ во сеќавање на своето минато.
Националните анкети во последните месеци покажаа дека АфД е втора по популарност зад мејнстрим конзервативната опозиција, а партијата е особено силна на поранешниот комунистички исток на земјата. паг/
Фото: Фејсбук