Умерен до засилен северен ветер и дожд, значително заладување во текот на неделата
- Умерен до засилен северен ветер ќе почне да дува од денеска, кој најизразен ќе биде утре и кон крајот на работната недела. Ова ќе предизвика значително заладување во текот на неделата.
![Умерен до засилен северен ветер и дожд, значително заладување во текот на неделата](https://mia.mk/index.php/images/20240107132654_big_730x400_7.webp )
Скопје, 8 јануари 2024 (МИА) - Времето денеска ќе биде променливо облачно со повремени врнежи од дожд, на планините и на повисоките места во северните делови со врнежи од снег.
Ќе дува умерен, а наместа долж Повардарието повремено засилен ветер од северен правец. Од вечерните часови особено во северните и источните делови врнежите ќе преминуваат во снег и понекаде во пониските места.
Минималната температура ќе биде во интервал од 1 до 6, а максималната ќе достигне од 5 до 11 степени.
Во Скопје облачно со повремени врнежи од дожд. Кон крајот на денот и во текот на ноќта во делови од котлината врнежите ќе преминуваат во снег. Ќе дува умерен ветер од северен правец. Минималната температура ќе се спушти до 4, а максималната ќе достигне до 8 степени.
Во ноќта кон вторник и во вторник претпладне врнежите ќе престануваат и особено во северните и источните делови повремен снег ќе паѓа и на пониските места. Во вторник и потоа и кон крајот на работната недела ќе дува повремено силен северен ветер најизразен вдолж Повардарието и ова ќе предизвика значително заладување во текот на следната седмица. бт/нд/
Фото: МИА архива