Брисел, 25 јули 2024 (МИА) -  Со влошувањето на економската ситуација во Русија поради острите западни санкции, Владимир Путин „продава лаги“ за силата на руската економија што треба да се негира, сметаат министри за финансии на осум земји-членки на ЕУ.

Тие велат дека има знаци дека руската економија е „советизирана“, со многу белези на поранешниот СССР, вклучително и експропријација на приватна сопственост за финансирање на јавните трошоци, „целосно непочитување на социјалната и економската благосостојба на населението“ и курс кон воена економија, пишува лондонски Гардијан.

„Ако Путин продолжи по овој пат, долгорочната штета за руската економија ќе биде значителна“, напишаа тие во заедничката статија за Гардијан.

Тие нагласија дека е од суштинско значење за западните демократии да го засилат притисокот, поради стравувањата дека доколку утре има прекин на огнот во Украина, Русија ќе се фокусира на зајакнување на својата ослабена економија „за втор напад врз Европа“ во наредните години.

„Со ресоветизирање на руската економија, Путин го отвори патот кон сопствената пропаст. Сега е време Западот уште повеќе да го засили притисокот. Поддршката на Украина и поткопувањето на способноста на Русија да води војна на секој чекор треба да биде главен приоритет. на секоја демократска земја“.

Тие веруваат дека има многу знаци дека воената економија на Русија се влошува, бидејќи, како што велат, ефективни се санкциите и другите мерки за слабеење на руската економија.

„Но, може да се направи повеќе. Мораме да продолжиме да го зголемуваме притисокот врз режимот на Путин и да ја поддржуваме Украина“, се вели во написот потпишан од министрите за финансии на Шведска, Данска, Естонија, Финска, Литванија, Латвија, Холандија и Полска.зш/