Брисел, 21 јули 2023 (МИА) - Министрите за внатрешни работи на ЕУ направија чекор напред кон усогласувањето на Пактот за миграција и азил на Унијата, постигнувајќи напредок во прецизирањето на мерките насочени кон ефикасно справување со вонредни миграциски кризи, информира шпанскиот министер за внатрешни работи Фернандо Гранде-Марласка.

- Се надеваме дека пред крајот на овој месец ќе го имаме ставот на Советот на ЕУ и ќе можеме да ги започнеме и преговорите за регулативата за кризи. Работиме на тоа и тоа е наш приоритет, изјави Гранде-Марласка на дводневниот неформален состанок на министрите за внатрешни работи и за правда на земјите членки на ЕУ, што вчера и денеска се одржува во шпанскиот град Логроњо.

Тој информира дека министирите разговарале за потребата од унапредување на Регулативата за управување со кризи, како дел од Пактот за миграција и азил, што шпанското претседателство има за цел да биде донесен пред изборите за новиот состав на Европскиот парламент следниот јуни.

- Имаме консензус дека мора да дејствуваме на економските текови кои го потхрануваат организираниот криминал, за да се прекине неговата активност, додаде Гранде-Марласка.

На зедничката прес-конференција со Гранде-Марласка, европската комесарка за внатрешни работи Илва Јохансон апелираше на отворен пристап во усогласувањето на документот.

- Да не западнеме во брзање и итност поради густиот распоред, но и да не застанеме ниту една минута за да договориме пакт, кој ќе биде неопходен и суштински, додаде Јохансон.

На средбата во Логроњо станало збор и за промовирање на мерки со кои би се избегнале кризи и загуби на животи на мигрантските рути.

Покрај за проблемот со миграцијата, министрите разговарале и за зајакнување на меѓународната соработка во борбата против шверцот на дрога, безбедноста во дигиталната сфера, безбедносниот дијалог со земјите од Латинска Америка, како и за влијанието на ситуацијата во Украина врз европската сигурност, при што е повторена посветеноста и солидарноста на земјите членки и на ЕУ со Киев и украинскиот народ.

Во тој контекст еврокомесарката Јохансон најави дека ќе предложи продолжување на Директивата за привремена заштита, што важи за бегалците од Украина, до март 2025 година. сп/

Фото: ЕУ