Скопје, 11 септември 2024 (МИА) - Министерот за јавна администрација Горан Минчев денеска одржал средба со делегација од Агенцијата на САД за меѓународен развој (УСАИД), предводена од Марк Елингстад, директор на Канцеларија за демократија и владеење во Република Северна Македонија.

Дискусијата, како што соопштија од Министерството, била фокусирана на продлабочување на соработката меѓу Министерството за јавна администрација и УСАИД за унапредување на демократското владеење, транспарентноста и отчетноста во јавниот сектор.

Министерот Минчев изразил благодарност за долгогодишната соработка и поддршка на УСАИД со Република Северна Македонија, особено во областите на институционални реформи, градење капацитети и промовирање на поефикасна, транспарентна администрација фокусирана кон граѓаните.

-Нашата соработка со УСАИД беше инструментална во поттикнувањето на реформите кои го поддржуваат демократското владеење и ги зајакнуваат институциите во јавниот сектор. Очекуваме да ја продлабочиме оваа соработка за да одговориме на потребите на нашите граѓани, усогласувајќи се со најдобрите меѓународни практики, изјавил Минчев.

Директорот Елингстад ​​ја истакнал посветеноста на УСАИД за поддршка на напорите на Северна Македонија кон подобрување на процесите на јавната администрација и негување на културата на отвореност и одговорност во владините институции. Тој ја посочил важноста на заедничките иницијативи кои придонесуваат за поинклузивен, поодговорен и ефективен систем на управување.

Двете страни, како што е наведено во соопштението, ја потврдиле посветеноста за унапредување и продлабочување на соработката преку проекти кои дополнително ќе ги зајакнат институциите и ќе обезбедат поефективна испорака на услугите за граѓаните. дма/ац/

Фото: МИА архива