24 октомври 2024

Македонска Каменица - Општина Македонска Каменица започна постапка за спроведување на Јавна набавка за зимско одржување на локалните патишта на целата територија на Општината, соопшти денеска градоначалникот Димчо Атанасовски.

Целта на Јавната набавка, како што стои во информацијата, е зголемување на мобилноста и безбедноста во сообраќајот на сите граѓани, без исклучок. 

- Одржувањето и проодноста на локалните патишта и улици е од витално значење за сите наши граѓани, особено за жителите од најкрајните планински населени места, каде движењето значително е отежнато поради обилни врнежи од снег, истакна Атанасовски

Пристапот до домовите на граѓаните, како во урбаната, така и во селските средини, според него, останува приоритетен и клучен сегмент во нашето работење.

- Јавната набавка предвидува набавка и испорака на ризла и сол за зимско одржување на локалните патишта и Чистење на снег и снежни наноси и посипување со сол и ризла на локалните патишта во општина Македонска Каменица за зимска сезона 2024-2025 година, додаде Атанасовски.

Сите заинтересирани за учество во јавната набавка како што посочи, повеќе детали со линк за пријавувањето може да побараат на општинската веб страница. 

Гевгелија - ЈОУ Библиотека „Гоце Делчев“-Гевгелија, во соработка со НУ „Музеј-Гевгелија“, организира Изложба „НарАртива II: 150 години импресионизам“, што ќе се отвори вечер во Галеријата „Амам“.

Изложбата го одбележува јубилејот од одржувањето на првата импресионистичка изложба во париското студио на Гаспар-Феликс Турнашон, легендарниот фотограф познат како Надар во 1874 година и има за цел да ги изнесе на виделина линиите на поврзување помеѓу визуелното и текстуалното, обезбедувајќи увид во некои од механизмите на комуникација помеѓу овие два облика на индивидуалниот творечки израз.

На изложбата ќе бидат поставени дела од ликовните уметници Вангел Срнаков, Владимир Илиевски, Никола Пијанманов, Гоце Илиевски, Љупка Галазка - Василев, Тони Попов, Габриела Стахурска Гошева, Горан Јованов, Миле Ничевски, Иван Кал’чев, Мирјана Крстева Массетти и Дамјан Ѓуров.

Според организаторите, импресионизмот, како во сликарството, така и во литературата, подразбира отстапување од стандардите на реализмот, централизирајќи се околу минливото, субјективното и сетилното, а импресионистичките и симболистичките дела му овозможуваат на реципиентот да ја истражува сложеноста на видливото, замаглувајќи ја границата помеѓу објективното и субјективното.

Изложбата, со настап во духот на книжевниот импресионизам, ќе ја отвори Стефчо Стефанов.

Скопје - Поради дефект во шахта, без вода од 09:00 часот се корисниците на дел од улица востаничка во Општина Центар, соопшти ЈП Водовод и канализација - Скопје

Вода од 09:00 часот немаат и корисниците на улиците од бр 27 до бр 35 во Сопиште.

Водоснабдувањето ќе биде прекинато до санација на дефектот.

Скопје - Поради  дефект на улична цевка од „2“ на улица „Скупи бр 9/3, без вода ќе останат корисниците од улица „3“ до ул „9“.

Како што информираат од ЈП „Водовод и канализација“ водоснабдувањето ќе биде прекинато од 10:10 часот до завршување на интервенцијата.