Бари, 14 јуни 2024 (МИА) - Лидерите на земјите од Г7 ветија дека ќе продолжат со воена, финансиска и хуманитарна помош за Украина, се наведува во завршната изјава од самитот на седумте најразвиени земји во Италија, што беше објавена денеска.

-Ја потврдуваме нашата континуирана поддршка за Украина, онолку долго колку што е потребно. Заедно со меѓународните партнери, посветени сме да продолжиме да даваме воена, финансиска, хуманитарна и поддршка на Украина за обнова по завршувањето на војната, се наведува во соопштението објавено на веб-страницата на италијанското претседателство на Г7.

Г7 го поздрави одржувањето на мировната конференција за Украина во Швајцарија на 15-16 јуни и вети дека ќе работи на обезбедување максимална меѓународна поддршка за таканаречената „мировна формула“ на украинскиот претседател Володимир Зеленски. Земјите од Г7 изразија загриженост поради поддршката на Кина за Русија во последната изјава и го повикаа Пекинг да изврши притисок врз Москва да ја прекине специјалната воена операција во Украина.

Лидерите на Г7 ја повикаа Кина да поддржи сеопфатен, праведен и траен мир во Украина заснован на почитување на територијалниот интегритет и принципите на Повелбата на Обединетите нации, вклучително и директен дијалог со Украина. Лидерите на Г7 тврдат дека континуираната поддршка на Кина за руската одбранбена индустриска база и овозможува на Русија да ја продолжи својата специјална воена операција и ја повикаа Кина да престане да пренесува материјали за двојна употреба, вклучително и компоненти за оружје и опрема.

Г7, исто така, му се закани на Иран со санкции поради неговата воена помош за Русија и го предупреди Техеран да не пренесува балистички ракети и поврзани технологии во Москва, бидејќи рече дека тоа ќе доведе до значителна ескалација и директна закана за европската безбедност.

Земјите од Г7 ветуваат дека ќе продолжат да „вршат значителен притисок“ врз приходите на Русија од енергетските ресурси и другите стоки, што ќе вклучува и подобрување на ефективноста на политиките за контрола на цената на нафтата. Лидерите на земјите од Г7 ја повикаа Русија да плати 486 милијарди долари за штетата што и ја нанесе на Украина за време на специјалната воена операција, а штетата ја процени и Светска банка.

Земјите од Г7 изјавија дека употребата на нуклеарно оружје во конфликтот во Украина е неприфатлива.

-Секоја употреба на нуклеарно оружје од страна на Русија во контекст на агресија врз Украина би била неприфатлива, се наведува во документот.

Земјите од Г7, исто така, го осудија распоредувањето на руско нуклеарно оружје во Белорусија и нагласија дека остануваат посветени на спречување на ширењето и употребата на оружје за масовно уништување. Земјите од Г7 ја истакнаа потребата од стапување на сила на Договорот за сеопфатна забрана на нуклеарни тестови. Во документот се повикува и Русија да се придржува до мораториумот на нуклеарните тестови.

-Нагласуваме дека секоја употреба на хемиско, биолошко или нуклеарно оружје од страна на Русија ќе има сериозни последици, се наведува во документот. мс/

фото: ДПА