Скопје, 19 мај 2023 (МИА) - Полицијата поднесе кривична пријава за „малтретирање во вршење на службата“ против полицаецот кој по завршување на ракометен натпревар во салата „Билјанини извори“ удри ракометар. Одделот за внатрешна контрола  пак ќе покрене дисциплинска постапка, до чие завршување полицаецот ќе биде суспендиран од работа.

Како што информираат од МВР, Одделот за внатрешна контрола, криминалистички истраги и професионални стандарди до Специјализираното одделение за гонење на кривични дела сторени од лица со полициски овластувања и припадници на затворската полиција при Основното јавно обвинителство за гонење организиран криминал и корупција – Скопје, поднесе кривична пријава против Х.Р., вработен како полициски службеник во полициска станица на подрачје на СВР Охрид, поради постоење основи на сомневање дека  сторил кривично дело „малтретирање во вршење на службата“, по член 143 став 1 од Кривичниот законик.

-Имено, пријавениот на 13.05.2023 година, околу 20:00 часот во Спортската сала „Билјанини извори“ во Охрид по завршување на ракометен натпревар, при вршење на службата со умисла извршил малтретирање врз оштетениот Ф.Т. на начин што неосновано и прекумерно употребил средства  за присилба врз него, појаснуваат од МВР.

Одделот за внатрешна контрола, криминалистички истраги и професионални стандарди, како овластен предлагач, против Х.Р. ќе покрене постапка за утврдување на дисциплинска одговорност, а работникот ќе бидат суспендиран од работа до завршување на дисциплинската постапка. сст/дма/

Фото: МИА архива