Пном Пен, 7 август 2023 (МИА) - Кралот на Камбоџа го одобри номинирањето на најстариот син на премиерот Хун Сен за следен премиер, според декретот објавен денеска, со кој се потврдува долгоочекуваната транзиција на власт.

Указот, со кој се потврдува 45-годишниот армиски генерал Хун Манет, образован во Запад, беше споделен на каналот Телеграм на неговиот татко и го сигнализира претстојниот крај на поранешните герилци на Црвените Кмери. Речиси четириесет години беа на чело на земја која сега се опоравува од децениските војни и сиромаштија.  

За назначувањето е потребно и одобрение од новоизбраното Национално собрание. Тоа се очекува кон крајот на овој месец, по убедливата победа на владејачката Камбоџанска народна партија на минатомесечните избори. Камбоџанската народна партија освои 120 од 125 парламентарни места во трката што ја елиминираше сета одржлива опозиција.

Минатиот месец, Хун Сен рече дека ќе се повлече и ќе му ја предаде власта на својот син во август, ставајќи крај на 38-годишното владеење во кое воспостави стабилност по години војна, но ја задуши демократијата во процесот. Сепак, Хун Сен ќе ги задржи важните функции во Законодавниот дом и во владејачката партија. Хун Манет (45) студирал во САД и Британија, каде магистрирал и докторирал економија.

Дипломирал и на престижната американска воена академија „Вест Поинт“ и бил заменик врховен командант на кралските вооружени сили и командант на копнените сили на земјата.  мс/

фото: Википедија