Рим, 25 јануари 2025 (МИА) - Италијанската премиерка Џорџа Мелони од денеска до понеделник престојува во посета на Саудиска Арабија, по што ќе замине за Бахреин, каде ќе разговара за ситуацијата во Сирија и Либан и други актуелни меѓународни прашања, соопштија извори блиски до италијанската Влада.

Премиерката денеска пристигна во Џеда за да го поздрави екипажот на еден италијански брод, а потоа ќе продолжи кон Ал Ула, археолошки локалитет и наследство на УНЕСКО, каде ќе се сретне со саудискиот престолонаследник Мохамед бин Салман.

Теми на разговор ќе бидат Сирија, Либан, израелско-палестинскиот конфликт, Јемен и Црвеното Море, Иран и Украина, соопштија извори од италијанската Влада.

Мелони и Салман ќе потпишат заедничка декларација за започнување на стратешко партнерство меѓу двете земји.

Предвидени се договори и во областа на одбраната, соработката во енергетскиот сектор, спортот и заштитата на културното и археолошкото наследство.

Во Ал Ула ќе се одржи тркалезна маса на која ќе учествуваат претставници на италијански и саудиски институции и големи компании. Се очекува да бидат потпишани неколку договори.

Мелони в понеделник ќе отпатува во Бахреин, што е прва посета на италијанскиот премиер на земјата, каде со кралот Хамад бин Иса Ал Калифа ќе разговара за клучните прашања од билатералната соработка, почнувајќи од одбраната и борбата против илегалната имиграција. рп/

Фото: АНСА