Десетта манифестација „Пишуваме и твориме на српски јазик“
- Здружението на Срби и Македонци „Бранко Чајка“ од Тетово викендов беше домаќин на јубилејната, десетта детска поетска манифестација „Пишуваме и твориме на српски јазик“.
![Десетта манифестација „Пишуваме и твориме на српски јазик“](https://mia.mk/index.php/images/20221114015701_big_730x400_3.webp )
Тетово, 31 октомври 2022 (МИА) - Здружението на Срби и Македонци „Бранко Чајка“ од Тетово викендов беше домаќин на јубилејната, десетта детска поетска манифестација „Пишуваме и твориме на српски јазик“.
Манифестацијата се одржа Духовно-културниот центар „Кирил Пејчиновиќ“ кој се наоѓа во манастирскиот комплекс на црквата „Св. Атанасиј“ во село Лешок. Учениците од основните училишта кои наставата ја следат на српски јазик, како и деца кои имаат српско потекло, а се од други основни училишта во државава, беа учесници на манифестацијата.
-Од оваа година, бидејќи е јубилејна, манифестацијата доби своја химна. Текстот на химната е на поетот Власта Цениќ од Србија, а музиката ја напиша Гоце Симоноски, композитор од Тетово. Главна цел на проектот е поттикнување на творештвото и презентација на културното наследство на припадниците на српскиот народ во Република Северна Македонија и чување на нивниот културен идентитет особено кај децата и младите, изјави Соња Андонов, претседателка на Здружението.
![српски јазик Тетово 2](/articles/images/%d0%b4%d0%b5%d1%81%d0%b5%d1%82%d1%82%d0%b0-%d0%bc%d0%b0%d0%bd%d0%b8%d1/ftef6HxxN/placeholder.webp?use_watermark=0)
На главниот дел на програмата учествуваа учениците со свои творби кои оваа година се пишувани на тема „Роденден“. На овогодинешната манифестацијата дојде Виолета Јовиќ, поетеса и писател за деца од Србија.
-Целта е на учесниците да им се овозможи средба со поет од Србија, а воедно и да се промовира српското творештво за деца. Програмата содржеше и три пиеси за деца на српски јазик како дел од проектот „Школа српског језика“ (Школа за српски јазик) одобрен од Фондот за бегалци и раселени лица и за соработка со Србите во регионот. Сите учесници на крајот, заедно со членовите на КУД „Бранко Чајка“, заиграа српско оро, изјави Андонов.
Проектот е поддржан од Министерството за култура и информирање на Република Србија. ас/хс/