Во Стар Дојран ќе се открие скулптурата „Срце за вечноста", благодарност за Емилија Динева, првиот донор на срце и органи во Македонија
- Во Градскиот парк во Стар Дојран денеска ќе биде откриена спомен скулптурата/урбана инсталација „Срце за вечноста", која е изработена во знак на чест, почит и благодарност кон хуманоста и чо
![Во Стар Дојран ќе се открие скулптурата „Срце за вечноста](https://mia.mk/index.php/images/20221108150325_big_730x400_82.webp )
Дојран, 26 август 2021 (МИА) - Во Градскиот парк во Стар Дојран денеска ќе биде откриена спомен скулптурата/урбана инсталација „Срце за вечноста", која е изработена во знак на чест, почит и благодарност кон хуманоста и човечноста на семејството на Емилија Динева, првиот донор на срце и органи во земјава.
- Идејата на оваа акција е уште еднаш да се одаде почит на Емилија Динева и нејзиното семејство за овој несебичен и херојски чин и преку јазикот на уметноста да се поттикне органо дарителството како врв на хуманост и можност за спасување на стотици животи, велат Никола Писарев од Центарот за современи уметности, авторот на скулптурата Андреј Миневски, и Влатко Динев (син на Емилија Динева).
Скулпурата „Срце за вечноста“ на младиот академски скулптор Андреј Миневски е водена од идејата да се овековечи дарувањето на органи како еден од највисоките чинови на човековата хуманост и можност кога еден живот згаснува друг да се распламти односно како што најчесто и бива да започне одново. Токму затоа, се појаснува во соопштението, и тематиката на скулптурата но и нејзината визуелност ја третира и темата на бесконечноста и начините со кои човекот може да се поврзе со бесконечноста преку постојната размена на енергии и материи. На овој начин авторот го овековечува херојството на Динева односно нејзиното семејство отворајќи и го патот до бесконечноста и незаборавот.
Самата скулптура е работена во техника која опфаќа спој на различни материјали како мермерно брашно, епоксид, метал изработени во стандарден скулпторски опус и доведени до совршенство од вештата рака на авторот.
Реализацијата на проектот е на Центарот за современи уметности - Скопје и Општина Дојран со финансиска поддршка од Фондацијата отворено општество – Македонија. цр/са/