Во галеријата „Остен“ 53-та светска галерија на карикатури
Скопје, 3 ноември 2021 (МИА) - Во галеријата „Остен“ во Скопје денеска ќе биде отворена 53-та светска галерија на карикатури, при што посетителите ќе можат да ги погледнат номинираните и наградени карикатури во рамки на проектот „ЕУ - Работа во тек" организиран од Гете-институт Скопје.
Од тимот на Гете-институт најавија дека на изложбата ќе бидат изложени карикатури од 32 селектирани и наградени карикатуристи.
На наградените ќе им бидат врачени наградите, па по овој повод, во Скопје се дојдени и карикатуристи од Белгија, Израел, Хрватска, Србија.
Во рамките на активностите организирани од Гете-институтот и галеријата „Остен“, од 2 до 4 ноември се одржува тридневна работилница за млади карикатуристи од регионот, а предавач ќе биде Лук Десхимакер од Белгија.
Во четврток во ЕУ-инфоцентарот во Скопје ќе биде одржана панел дискусија на тема „Надежи и стравови за пристап до ЕУ - преку острото око на карикатуристот“. Модератор на панел дискусијата ќе биде Корнелија Конеска од галеријата „Остен“.бт/са/
