Дубаи, 13 март 2025 (МИА) - Иранскиот министер за надворешни работи Абас Арагчи не ја отфрли можноста за разговори со Вашингтон, но рече дека тие можат да се одржат само под еднакви услови за двете страни, објавија иранските медиуми.

Минатата недела, американскиот претседател Доналд Трамп рече дека испратил писмо до иранскиот врховен водач, ајатолахот Али Хамнеи, во кое нуди преговори за иранската нуклеарна програма, но исто така предупреди дека „има два начини на кои можеме да се справиме со Иран: со воени средства или да направиме договор за да го спречиме Техеран да се здобие со нуклеарно оружје“.

-Ако ги започнеме преговорите додека другата страна врши максимален притисок, ќе преговараме од позиција на слабост и нема да постигнеме ништо, рече Арагчи во интервју за ирански весник. „Другата страна мора да биде убедена дека политиката на притисок е неефикасна - само така ќе можеме да седнеме на преговарачка маса под еднакви услови“, додаде првиот човек на Иран.

Вчера Хамнеи рече дека преговорите со администрацијата на Трамп, за кои рече дека имаат преголеми барања, едноставно „ќе го затегнат јазолот на санкциите и ќе го зголемат притисокот врз Иран“.

Иранскиот врховен лидер Али Хамнеи, кој го има последниот збор за државните прашања во Исламската Република, минатата недела рече дека Техеран нема да биде принуден да преговара. Изразувајќи подготвеност да склучи договор со Техеран, Трамп ја оживеа својата кампања за „максимален притисок“, која беше спроведена за време на неговиот прв претседателски мандат, да го изолира Иран од глобалната економија и да го намали неговиот извоз на нафта на нула. мс/

фото: ЕПА