12:00/ 30 tetor/ 2024

Shkup - Në takimin e 74-të rajonal të Organizatës Botërore të Shëndetësisë (OBSH) për Evropën që u mbajt së fundmi, ministri i Shëndetësisë dhe kryetari i Aleancës për Shqiptarët, Arben Taravari mori vlerësime nga Dr. Hans Kluge, drejtori rajonal i OBSH-së për Evropën. Dr. Kluge shprehu vlerësime për përpjekjet e Taravarit për përditësimin e listës pozitive, një veprim i cili pasqyron përkushtimin e tij për përmirësimin e shërbimeve shëndetësore dhe qasjes ndaj barnave të nevojshme për qytetarët.

Shkup - Ministri i Punëve të Jashtme dhe Tregtisë së Jashtme, Timço Mucunski sot dhe nesër merr pjesë në Konferencën Ministrore për dimensionin njerëzor të Formulës për paqe të Ukrainës, e cila po mbahet në Montreal, Kanada. Konferenca organizohet në bashkëpartneritet nga Ministritë e Punëve të Jashtme të Kanadasë, Norvegjisë dhe Ukrainës. Në konferencë, siç informoi Ministria e Punëve të Jashtme dhe Tregtisë së Jashtme, pritet ministrat të shkëmbejnë mendime dhe qëndrime rreth kthimit të të burgosurve të luftës dhe civilëve të ndaluar ilegalisht si rezultat i luftës ruso-ukrainase, si dhe gjetjes së mekanizmave më të përshtatshëm për kthimin e personave të zhvendosur ilegalisht dhe fëmijëve ukrainas të dëbuar me forcë nga Federata Ruse.

Shkup - Tridhjetë e nëntë vjeçari nga Manastiri ka ushtruar dhunë në familje ndaj ish partneres së tij. Siç bëri të ditur sot Prokuroria publike ai e ka mbajtur të mbyllur në një uikend- shtëpizë në Nizhopole dhe e ka rrahur për një orë. "Më 21 tetor, pas kryerjes së dhunës në familje në mënyrë mizore i dyshuari e ka mbyllur në mënyrë të paligjshme dhe e ka mbajtur në gjendje të tillë duke e lënduar më pas fizikisht ish partneren e tij. E dëmtuara së pari ka hyrë në automjetin e tij. Ai ka filluar ta drejtojë makinën dhe fillimisht e ka goditur me grusht në kokë. Pastaj e ka dërguar në uikend- shtëpizën e tij në Nizhepole, ku e ka shtyrë me forcë, e ka mbyllur dhe për një orë e ka goditur me shuplaka, grushte, shqelma në kokë dhe në trup. E dëmtuara nuk ka mundur më shumë të durojë sjelljen e tij të dhunshme dhe ka marrë një thikë nga kuzhina duke prerë damarët e krahut të majtë. Por i dyshuari ka vazhduar ta godasë duke i shkaktuar më shumë lëndime fizike", thekson Prokuroria publike në kumtesën e sotme.

Shkup – Gjatë 24 orëve të fundit janë regjistruar 10 zjarre në qiell të hapur në territorin e gjithë shtetit. Tre zjarrfikës nga Brigada Territoriale Zjarrfikëse në Qytetin e Shkupit dje, prej orës 12:30 deri në orën 6:05, me një automjet shuanin zjarr në qiell të hapur në atarin e fshatit Brezë të Shkupit. Denoncimi ishte nga një person zyrtar nga EVN Maqedoni. Për zjarrin ishin njoftuar BTZ e Qytetit të Shkupit, Komuna Çuçer Sandevë dhe NP “Pyjet kombëtare”.  Siç informon Qendra me Menaxhim me Kriza (QMK), zjarrfikësit e Shkupit dje, prej orës 15:45 deri në orën 16:35, kanë shuar mbeturina të djegura dhe goma në lagjen Lisiçe e Poshtme drejt fshatit Jurumleri. 

Madrid – Të paktën 51 persona humbën jetën në vërshimet e djeshme në pjesën lindore dhe jugore të Spanjës. Sipas mediave lokale, disa persona konsiderohen të zhdukur, përderisa reshjet e shiut e dëmtuan komunikacionin hekurudhor dhe shkaktoi alarm të rremë për shira të rrëmbyeshëm, sepse pritet që moti i pafavorshëm të vazhdojë. Autoritetet informuan se janë gjetur një pjesë e trupave pasi vërshimet dje morën automobila në rrugët e fshatrave dhe e ndërprenë komunikacionin hekurudhor në pjesë të mëdha të pjesës lindore dhe jugore të vendit, informon agjencia spanjolle EFE. Një tren me shpejtësi të madhe me gati 300 udhëtarë doli nga binarët në afërsi të Malagës, ndërsa autoritetet hekurudhore njoftuan se askush nuk është lënduar. Vërshimet gjithashtu e ndërprenë komunikacionin hekurudhor në relacionet mes Valencias dhe Madridit, si dhe linja të tjera urbane përgjatë zonave të goditura. 

Atlanta – Një burrë i armatosur me disa armë të ndryshme gjuajti të paktën 15 të shtëna nëpër mure, në derën e ballkonit të dhomës së tij në hotelin Four Seasons në Atlanta gjatë një shkëmbim zjarri pasditen e djeshme dhe u arrestua, deklaruan nga policia. “I dyshuari 70 vjeçar përdori pistoletë dhe një armë gjahu gjatë të shtënave", deklaroi shefi i policisë së Atlantës, Darin Sherbaum në konferencë për media. Dy policë iu përgjigjën zjarrit.  Një polic dhe i dyshuari janë dërguar në spital me lëndime, jashtë rrezikut për jetë.

Nju-Jork - Sipas Organizatës së Kombeve të Bashkuara, nëse Izraeli i zbaton ligjet e reja me të cilat ndërpriten lidhjet me agjencinë e OKB-së për refugjatët palestinezë (UNRVA), qeveria izraelite duhet t'i plotësojë nevojat e tyre sipas ligjit ndërkombëtar.  "Sekratari i përgjithshëm i OKB-së, Antonio Guteresh, deklaroi se OKB-ja nuk ka agjenci tjetër alternative. Agjencia e OKB-së për ndihmë për refugjatët palestinezë ishte me rëndësi jetike gjatë konfliktit mes Izraelit dhe Hamasit në Gazë, dhe ligjet e reja izraelite "do të kenë një efekt shkatërrues ndaj situatë humanitare" në territoret palestineze", deklaroi zëdhënësi i OKB-së, Stefan Duxharik.

Seul - Përfaqësues të Shërbimit të inteligjencës ushtarake të Koresë së Jugut (DIA) sot i informuan deputetët se Koreja e Veriut dukshëm ka dërguar një njesi speciale në frontin në Ukrainë.  "Nuk ka ende informacione të sakta se ushtarët e Koresë së Veriut janë vendosur në frontin ukrainas, por ekziston mundësia që disa njësi speciale të Koresë së Veriut janë dërguar në front", deklaruan deputetët Li Seong-kveun nga Partia e pushtetit popullor në pushtet dhe deputeti, Park San-Von nga partia kryesore demokratike opozitare.

Seul - Koreja e Jugut synon të dërgojë një ekip në Ukrainë për të monitoruar dhe analizuar vendosjen e ushtarëve të Koresë së Veriut, për të cilët thuhet se po luftojnë në anën e Rusisë, deklaroi sot një përfaqësues i zyrës presidenciale në Seul. Seuli dhe aleatët e tij besojnë se të paktën 11.000 trupa të Koresë së Veriut janë dërguar në Rusi, ndërsa më shumë se 3,000 prej tyre tashmë janë vendosur pranë vijës së frontit në Ukrainë.

Uashington - Kandidati republikan për president Donald Tramp, në vend që të kërkojë falje për komentet raciste të bashkëpunëtorëve të tij në një tubim në Nju Jork, mbrëmë deklaroi se ishte i nderuar të merrte pjesë në "festivalin e dashurisë". Trampi sulmin në Kapitoll më 6 janar të vitit 2020 e përshkroi si "festival të dashurisë". Ish presidenti i SHBA-së ka thënë se "asnjëherë nuk ka pasur një ngjarje kaq të mrekullueshme" sa tubimi i tij në qytetin e tij të lindjes në Nju Jork.

Uashington - Personi i dënuar me 30 vjet në një burg federal për sulmin me çekiç ndaj bashkëshortit të ish kryetares së Dhomës së përfaqësuesve, Nensi Pelosi u dënua me burgim të përjetshëm, pa mundësinë e lirimit me kusht pas një gjyqi të veçantë shtetëror. Në muajin qershor, një juri në San Francisko e shpalli fajtor të pandehurin Dejvid Depi nën akuza ku përfshihen edhe rrëmbimi me dhunë dhe sulmi ndaj një anëtari të familjes së një zyrtari federal. Përpara shpalljes së dënimit të sulmuesit Depi me burgim të përjetshëm në akuzën për rrëmbim, gjykatësi Heri Dorfman hodhi poshtë argumentet e avokatëve mbrojtës për një gjykim të ri shtetëror për sulmin e vitit 2022 ndaj Paul Pelosit i cili në atë kohë ishte 82 vjeç.

La Paz – E informojmë Bolivinë dhe bashkësinë ndërkombëtare për djegien e sotme të 21,6 tonëve kokainë të konfiskuar, bëri të ditur në Fejsbuk, ministri për Punë të Brendshme, Eduardo Del Kasitilo. Më 15 tetor, policia e Bolivisë zbuloi dhe sekuestroi 21.6 ton kokainë në një dërgesë, ku destinacioni i fundit ka qenë Gjermania. “Ky është konfiskimi më i madh i drogës në historinë e Bolivisë dhe një nga më të mëdhatë në rajon në vitet e fundit në një operacion si ky”, tha Kastilo.

Lisbonë - Trajneri i Sportingut, Ruben Amorim, pas fitores së djeshme ndaj Nacional (3:1) në çerekfinale të Kupës së ligës së Portugalisë i është përgjigjur pyetjes rreth largimit për në Mançester Junajted. Më 29 tetor u bë e ditur se klubi anglez pranoi t'i paguante ekipit portugez 10 milionë euro si dëmshpërblim për ekspertin e futbollit 39 vjeçar. "Asgjë nuk është vendosur ende. Nuk e di nëse kjo është ndeshja lamtumirëse e Sportingut. A do të jem në Old Traford të dielën? Do të jem në Lisbonë", deklaroi Amorim për "Sky Sports". Sipas parslajmërimeve nga Mançesteri, marrëveshja e trajnerit do të jetë sipas skemës "2+1".

Napoli - Trajneri i Napolit, Antonio Konte, është i kënaqur nga atmosfera në ekip dhe gatishmërinë e të gjithë futbollistëve që të vendosen në funksion të realizimit të rezultateve të mira. "Ajo që më bën krenar është se vetëm për katër muaj kemi arritur të krijojmë kohezion, ku mendojmë për ekipin, e jo për lojtarët individualë. Ky është një nga ekipet më të mira që i kam pasur në karrierë - të gjitha kanë vizion të njëjtë dhe qëllime të njëjta, nga krerët e klubit deri te personeli mjekësor. E tërë kjo krijon atmosferë të shkëlqyeshme. Unë marr frymë në atë pasion dhe entuziazëm, kështu që kur jam në atë mjedis, kjo e nxjerr në pah pasionin edhe tek unë. Pasioni në Napoli është përgjegjësi e madhe dhe kuptoj se ditët pas ndeshjeve mund të jenë të vështira nëse nuk fitoni. Ky është vend emocional, ku disponimi mund të ndryshojë shpejt", deklaroi Konte. Ai kërkoi të mos krijohet eufori pas fillimit të mirë të sezonit.