09:00 / 29 tetor / 2024

Shkup – Kuvendi sot në orën 14 duhet ta vazhdojë mbledhjen e 17-të në të cilën në rend dite janë shumë ligje me procedurë të shkurtër. Në vazhdimin e kaluar të mbledhjes së 17-të filloi debati për Propozimin e ligjit për ndryshimin e Ligjit për përcaktimin e emrave të rrugëve, shesheve, urave dhe objekteve tjera infrastrukturore, ndërsa në rend dite janë edhe ndryshimet e Ligjit për gjelbërim urban, të Ligjit për shitje dhe dhënie me qira të ndërtesave afariste dhe sipërfaqeve afariste të Republikës së Maqedonisë së Veriut, të Ligjit për rrugë shtetërore, të Ligjit për kohën e punës të punëtorëve mobil në komunikacionin rrugor dhe për aparatet e regjistrimit në komunikacionin rrugor, të Ligjit për shërbime postare, të Ligjit për vendskijime, të Ligjit për banim, të Ligjit për autokampe, të Ligjit për tokë ndërtimore, të gjitha me procedure të shkurtër. 

Shkup - Konferenca e parë vjetore e "Blumberg Adria" në Shkup me temë: "Back to business: Potenciali ekonomik dhe mundësitë zhvillimore për Maqedoninë" do të mbahet sot, ndërsa do ta hapë kryeministri Hristijan Mickoski dhe Jelisaveta Lazareviq, drejtoreshë e përmbajtjes së "Blumberg Adria". Në konferencë janë paralajmëruar analiza të Blumberg Adria "Unlocking Groëth: Economy & Capital Markets in North Macedonia“ dhe dy panel diskutime.

Shkup - Në organizim të FAR në bashkëpunim me Klubin për çështje dhe politika rinore në Kuvend sot do të mbahet Debat publik me rastin e Ditëve të edukimit mediatik 2024. Janë paralajmëruar fjalime hyrëse të kryetarit të Kuvendit, Afrim Gashi, sekretares së përgjithshme të Kuvendit, Marina Dimovska dhe koordinatores së Klubit për çështje dhe politika rinore, Dragana Bojkovska.

Shkup - Oda Ekonomike e teknologjive informative dhe komunikuese MASIT sot dhe nesër organizon konferencën e 19-të vjetore. Temë e konferencës sot është "Inteligjenca artificiale përballë fuqisë punëtore – përmes adaptimit deri tek inovacioni", ndërsa nesër temë do të jetë "Aplikimi praktik i inteligjencës artificiale në mjekësi, farmaci dhe stomatologji" e cila organizohet në bashkëpunim me zyrën e avokatit Najdenovski, bashkëorganizator i ngjarjes për ditën e dytë.

Shkup - Paradite në disa lugina do të ketë kushte për paraqitje të mjegullës së dobët. Gjatë ditës do të jetë mot me diell, vranësira mesatare dhe me erë të dobët deri mesatare nga drejtimi verior. Temperatura minimale do të jetë në interval prej 1 deri 8, ndërsa ajo maksimale do të jetë prej 20 deri 26 gradë.

Shkup – Të rinjtë në Maqedoni të Veriut dhe në Mal të Zi më së voni në Evropë i lëshojnë shtëpitë e prindërve të tyre, tregon analiza e portalit statistikor “Landgeist”, e bazuar në të dhëna të Eurostatit. Ballkani është në krye të kësaj liste. Të rinjtë në Mal të Zi mesatarisht jetojnë me prindërit e tyre deri në moshën 33,3 vjet, në Maqedoni të Veriut deri 32,1, në Kroaci 31,8, në Serbi deri 31,5, Greqi 30,6, ndërsa në Bullgari deri 30 vjet. Në Evropën Jugore dhe në Ballkan, më shumë se gjysma e njerëzve të moshës prej 20-25 vjet jetojnë me prindërit e tyre. Në Evropën Veriore, kjo përqindje është nën 20%, e madje edhe nën 10%.

Kiev - Të paktën katër persona u vranë, ndërsa katër të tjerë janë plagosur në sulmet ajrore ruse gjatë natës ndaj Harkovit dhe Kievit, kumtuan sot autoritetet ukrainase. Katër persona u vranë në bombardimet ruse pas mesnatës në Harkov, deklaroi prefekti i Harkovit, Igor Teherov në aplikacionin Telegram.

Phenian – Ministrja e Punëve të Jashtme të Koresë së Veriut, Çoe Son-hui, shkoi për vizitë zyrtare në Rusi, njoftoi agjencia koreanoveriore KCTA. Vizita ndodh në kohë të intensifikimit të bashkëpunimit mes Moskës dhe Phenianit në kontekst të luftës në Ukrainë. KCTA njoftoi se delegacioni i kryesuar nga Çoe ka shkuar në Rusi për bisedime zyrtare.

Seul - Bashkëpunimi ushtarak midis Rusisë dhe Koresë së Veriut paraqet "kërcënim serioz për sigurinë globale", deklaroi sot presidenti jugokorean Jun Suk-Jol. Lideri jugokorean e dha deklaratën e tij pasi që dje Pentagoni kumtoi se Koreja e Veriut ka dërguar 10.000 ushtarë të saj në Rusi. "Ky bashkëpunim i jashtëligjshëm midis Rusisë dhe Koresë së Veriut është kërcënim serioz për sigurinë e bashkësisë ndërkombëtare dhe mund të paraqes një rrezik serioz për sigurinë tonë kombëtare", tha Jun.

Bejrut – Të paktën 62 persona janë vrarë, ndërsa më shumë se 200 janë plagosur në sulmin e djeshëm ajror izraelit ndaj luginës Beka në lindje të Libanit, transmetoi gazeta libaneze An – Nahar. Sipas raportit, në bombardimet ka numër të madh të viktimave civile, duke përfshirë gra dhe fëmijë. Banorë lokalë dhe kryetarët e qytetit Balbek konfirmojnë se sulmi ka shkaktuar humbje të mëdha në njerëz dhe shkatërrime në disa vendbanime, duke i përfshirë Halanian, Budain, Xfirin, Xhunin, Ramin dhe Alakin. 

Nju Jork – SHBA-ja mbrëmë në Këshillin e Sigurisë së KB-së ka paralajmëruar Iranin se do të përballet me pasoja serioze nëse kryen sulme të reja ndaj Izraelit apo forcave amerikane në Lindjen e Mesme. "Nuk duhet të kemi dilema që të mbrohemi. Për të qenë të qartë, SHBA nuk dëshiron përshkallëzim të mëtejshëm, por konsiderojmë se ky duhet të jetë fundi i shkëmbimit të drejtpërdrejtë të zjarrit midis Izraelit dhe Iranit", deklaroi ambasadorja e SHBA-së në KB, Linda Tomas-Grinfild.

Paris - Kapiteni i Anglisë, Hari Kejn e fitoi çmimin "Gerd Miler" për golashënues më të mirë sezonin e kaluar. Gjatë ceremonisë së "Topit të Artë", futbollisti i Bajernit të Mynihut e fitoi çmimin, të cilin, në parim, duhej ta ndajë me Kilian Mbapen.

Paris - Trajneri i Real Madridit, Karlo Ançeloti është fitues i çmimit "Trajner i vitit" gjatë ceremonisë së ndarjes së "Topit të Artë" për vitin 2024. Trajneri italian, së bashku me madrilent tjerë e bojkotojnë ceremoninë, pasi kanë kuptuar se Vinisius Zhunior nuk do të jetë fitues i "Topit të Artë".

Paris - Futbollistja e Barcelonës dhe kombëtares spanjolle, 26-vjeçarja Aitana Bonmati, për të dytin vit me radhë e fiton "Topin e Artë" në konkurrencë të femrave. "Çmimin e fitoi me meritë pasi ishte futbollistja më e mirë e Barcelonës në sezonin, ku katalonasit e fituan Ligën e kampionëve dhe të gjitha trofetë në Spanjë - kampionatin, Kupën dhe Superkupën.

Paris - Portieri i Aston Villës dhe kombëtares së Argjentinës, Emiliano Martinez për të dytin vit me radhë është portieri më mirë në botë. Sezonin e kaluar, portieri argjentinas fitoi trofeun në Kopa Amerika.

Paris - Ekipi i Reali Madridit është shpallur për "Klub të vitit" në ceremoninë për ndarjen e "Topit të Artë" për vitin 2024. "Mbretërit e fituan këtë mirënjohje pasi e fituan Ligën e Kampionëve dhe u shpallën kampionë të Spanjës.

Paris - Lamin Jamal nga Barcelona është shpallur lojtar më mirë i ri në ceremoninë për ndarjen e "Topit të Artë" në Paris. Atij i nda trofeu "Kopa" për lojtar më të mirë të ri të sezonit 2023/2024.

Madrid - Futbollisti i Real Madridit, Vinisius Zhunior reagoi në vendimin që t'i ndahet çmimi "Topi i Artë" mesfushorit të Mançester Sitit, Rodri për lojtarin më të mirë në sezonin 2023/2024. Vinisius përfundoi i dyti në votim. Braziliani, si dhe përfaqësuesit tjerë të Realit të Madridit, nuk mori pjesë në ceremoninë e ndarjes së çmimit, e cila u mbajt në Paris.

Paris - Mesfushori i Spanjës dhe Mançester Sitit, Rodri e fitoi "Topin e Artë" për vitin 2024. Ky çmim ndahet për futbollistin më të mirë për periudhën 01.08.2023 - 31.07.2024, ku përfshihet edhe Kampioati Evropian. Pas tij janë radhitur lojtarët e Real Madridit, Vinisius Zhunior, Xhud Belingem dhe Daniel Karvahal.