29 mars 2026

Kryetari i Komunës së Gostivarit, Valbon Limani, përmes një videoje në rrjetet sociale ka njoftuar se ka nisur transformimi i Parkut të Qytetit në Gostivar, në kuadër të projektit “Lidhja e rajoneve”, i financuar nga Bashkimi Evropian përmes Programit të Bashkëpunimit Ndërkufitar (IPA), në partneritet me Komunën e Gostivarit, theksohet në komunikatë, të cilën MIA e transmeton në formë integrale.

Ky projekt parasheh një sërë ndërhyrjesh infrastrukturore dhe estetike, me qëllim përmirësimin e cilësisë së jetës për qytetarët dhe krijimin e një hapësire moderne rekreative. Në fokus të punimeve është ndërtimi i një ure për këmbësorë, e cila do të lidhë dy anët e parkut dhe do të lehtësojë lëvizjen e vizitorëve.

Përveç kësaj, projekti përfshin edhe rregullimin e sipërfaqeve të gjelbra, rikonstruksionin e shtigjeve ekzistuese, vendosjen e pajisjeve të reja urbane, si dhe ndriçim publik modern me kandelabra.

Transformimi i parkut pritet t’i japë një pamje të re një prej hapësirave më të frekuentuara në qytet, duke e kthyer atë në një pikë tërheqëse për të gjitha moshat.

Foto: Komuna e Gostivarit