Мадрид, 11 мај 2026 (МИА) - Вкупно 94 патници и членови на екипажот досега се евакуирани од крузерот „Хондиус“ зафатен од смртоносниот хантавирус.

Како што соопшти шпанската министерка за здравство, Моника Гарсија, станува збор за државјани на 19 земји, кои вчера со осум специјални лета ги напуштиле Канарските Острови.

За денеска е најавена евакуација на уште шест лица за Холандија и 18 лица за Австралија.

Евакуацијата се случува една недела откако Светската здравствена организација (СЗО) соопшти дека тројца патници на бродот - постар холандски брачен пар и една германска државјанка - починале во сомнителна појава на хантавирус.

Хантавирусот може да предизвика треска и тешки респираторни заболувања кај луѓето, а најчесто се пренесува преку контакт со урина, измет или плунка од заразени глодачи.

Пред вчерашната евакуација бил извршен темелен епидемиолошки преглед на сите 152 патници на бродот, а резултатите покажале дека ниедно од лицата немало симптоми на заболувањето.

Гарсија изјави дека по евакуацијата, еден француски државјанин покажал симптоми на болеста, додавајќи дека француските власти ќе ги применат своите здравствени протоколи.

Таа додаде дека 34 лица, главно членови на екипажот, ќе останат на бродот и со крузерот ќе отпловат назад кон Ротердам.

Според СЗО, досега се потврдени шест случаи на хантавирус и уште два сомнителни случаи, од кои три завршиле со смртен исход.

Откога сите патници ќе го напуштат бродот, „Хондиус“, кој плови под холандско знаме, ќе го продолжи патувањето кон Ротердам со дел од екипажот. Телото на германската жртва ќе биде симнато од бродот дури по пристигнувањето таму откога претходно пловилото ќе биде целосно дезинфицирано.

Крузерот „Хондиус“ го почнал патувањето во Аргентина на 1 април, се закотвил кај Зелено'ртските Острови, а во средата вечерта отпловил кон Канарските Острови.

Бидејќи повеќе од 30 патници и членови на екипажот се симнале за време на претходните застанувања на бродот, здравствените власти од светот трагаат по можни сомнителни случаи. аб/сд

фото/МИА архива