Белград, 11 ноември 2025 (МИА) - Асоцијации на универзитетски професори и соработници ги повикаа администрациите на сите факултети на државните универзитети во Србија да ја прекинат наставата утре, среда, 12 ноември, и да ѝ дадат целосна поддршка на Дијана Хрка и барањето за распишување избори што таа го направи со штрајкот со глад.

Тие исто така ги повикаа сите универзитетски работници и студенти, како и граѓаните, да дојдат тој ден пред српскиот Парламент во 11:30 часот за да ја поддржат и во 11:52 часот да му оддадат почит на нејзиниот син Стефан Хрка и на сите оние кои ги загубија животите при падот на бетонската настрешница на железничката станица во Нови Сад на 1 ноември лани.

Во повикот се наведува дека по неколкумесечни студентски блокади и прекин на наставата на сите државни универзитети во земјата, факултетите во текот на летото, барајќи излез од речиси безнадежната ситуација, се вратија на наставата и испитите и ја завршија академската година.

„Во исто време, државата исполни само мал дел од своите обврски и тоа со големо задоцнување; - како во случајот со одредувањето квоти за запишување студенти во првата година од студиите - додека се чини дека нема намера да ги исполни другите. Неуставниот и незаконски Правилник 5/35 е на сила веќе седум и пол месеци“, се вели во соопштението.

Предупредено е дека автономијата на универзитетите е загрозена како никогаш досега.

„Со денови, силни полициски сили ги окупираа зградите на неколку факултети во Нови Сад, а Владата донесе одлука за основање нов факултет на Универзитетот во Ниш, и покрај фактот што надлежните универзитетски тела го отфрлија предлогот со убедливо мнозинство“.

Тие додаваат дека „општата состојба во општеството, предизвикана од неодговорните постапки на властите, ја оневозможува посветената наставна и научна работа на универзитетот“. 
Дијана Хрка од 2 ноември штрајкува со глад пред српското Собрание. зш/