Куманово, 11 ноември 2025 (МИА) - Куманово одбележува 81 година од ослободувањето. Бројни делегации, положија свежо цвеќе на споменикот на паднатите борци од Народноослободителната војна, Спомен костурница оддавајќи достојна почит на паднатите борци.

Свечената седница на која присуствуваа бројни гости од локалната власт, пратеници, претставници од Владата, од амбасадите, од збратимените градови на Куманово се одржа во занаетчискиот дом. Поради одржување на изборите, наместо „Ноемвриската награда“ градоначалникот Максим Димитриевски им додели благодарници на ликовниот уметник Зоран Арсовски-Бабата, проф. д-р Аљмир Рушити за придонесот во академската, научна, образовна област, на Иван Цветковски за афирмација на духовното наследство, на танцовите клубови „Динамик“ и „Виртус“ за танцовиот перформанс „Пафта“, за планинарот Бобан Стефановски, на спортскиот клуб „Предатор“ на ФК „Башкими“ и на младинскиот кошаркарски клуб.

Во говорот на свеченоста, градоначалникот Максим Димитриевски се осврна на историските моменти од ослободувањето на Куманово и борбата против фашистичкиот окупатор, кумановските народни херои и нивната жртва за денешно слободно Куманово и Македонија.

- Аманетот што ни го оставија е наша обврска за развој и унапредување на државата, сочувување на македонскиот идентитет, јазик и традиција, одржување на довербата создавање на нови искрени пријателства. Националните вредности имаат долгогодишен процес на создавање кој треба да се почитува и да се брани од сите лоши намери. Со почит и достоинствено признание на народните борци кои ги дадоа своите животи за слобода на сите нас се откажеме од намерата во одбраната на вредностите на нашиот град, првоборец, град на луѓе со ведар дух на поборници за заедништво и сплотеност, рече Димитриевски.

Тој кажа дека локалната самоуправа која му е доверена да ја води трет мандат ќе достигне повисок степен во исполнување на обврските и заштита на правата граѓаните, преку отчетност, ќе се залага за реализација на нови проекти кои ќе го унапредат квалитетот на живот на кумановци.

- Довербата на граѓаните претставува обврска која нѐ насочува кон имплементација и реализирање на бројни проекти и забрзан просперитет во сите општествени дејности подобрувајќи го секојдневното функционирање на нашите сограѓани. Современиот лик на Куманово продолжува да се развива во една урбана средина, за чие одржување потребно е единство транспарентноста и идеите за тоа на кој начин да дејствуваме и да бидеме ефикасни во исполнување на потребите во сите општествени области. Водиме грижа за групи на граѓани и возрасти како припадници на повеќе етнички заедници кои бараат повисок животен стандард, рече Димитриевски.

Во говорот потсети на реализираните проекти од различни свери и отвореност за идеи повика и повика на единство при реализација на приоритетите за доброто на граѓаните. ам/ев/

ФОТО: МИА и Општина Куманово