Вашингтон, 2 ноември 2024 (МИА) Стејт департментот одобри можен договор за продажба на воена опрема на Тајван вреден 320 милиони долари што вклучува радари и резервни делови за ловци F-16.
 
Ова беше објавено викендов на веб-страницата на Агенцијата за соработка во областа на одбраната (Defense Security Cooperation Agency, ДСЦА), која го извести Конгресот за очекуваниот договор.
 
-Предложената продажба ќе ја подобри способноста на примачот да се справи со тековните и идните закани, истовремено одржувајќи ја борбената готовност на флотата од авиони F-16 на примачот, се вели во соопштението на DSCA. Се нагласува дека очекуваниот договор нема да ја промени основната воена рамнотежа во регионот, ниту ќе има негативно влијание врз одбранбената способност на САД.
 
ДСЦА објави посебно соопштение за продолжување на услугите за комуникација во рамките на системот IMSE за уште две години. Вредноста на овој договор, чиј изведувач е компанијата General Dynamics од Вирџинија, изнесува 65 милиони долари. Вашингтон останува најважниот меѓународен партнер на Тајван и снабдувач на оружје. Сепак, САД немаат официјални дипломатски односи со островот: одобрувањето на договорот од страна на Стејт департментот беше адресирано до Канцеларијата за економско и културно претставништво на Тајпеј во Соединетите Држави.
 
Кон крајот на октомври, Пентагон објави друга, поголема испорака на оружје за Тајван во вредност од 2 милијарди долари: во рамките на овој договор, на островот за првпат ќе биде испорачана напреден систем за противвоздушна одбрана ХИМАРС што се користеше од вооружените сили на Украина за одбрана од руската агресија.
 
Претходно беше објавено дека претседателот на Тајван, Лај Цинде, планира да ги посети државата Хаваи и Гуам, која е островска територија на САД. Посетата на американската територија ќе се одржи како дел од неговото турнеја низ пацифичките земји, вклучувајќи ги Маршалските Острови, Тувалу и Палау. Овие три островски држави се дел од дванаесетте земји со кои Тајван има официјални дипломатски односи. кб/