Монтереј, 7 февруари 2025 (МИА) - Легендата на Реал Мадрид, Серхио Рамос и официјално потпиша со мексиканскиот клуб Монтереј. 38-годишниот дефанзивец ја продолжува кариерата откако беше без клуб во последните шест месеци откако ја напушти Севиља.

-Добредојдовте, Серхио Рамос! Повеќекратен шампион со Реал Мадрид и Пари Сен Жермен. Светски шампион и европски првак со Шпанија. Вашите лидерски квалитети, технички вештини и желба за победа ќе ги однесат „сино-белите“ многу високо, напиша новиот клуб на дефанзивецот.

Рамос избра да го носи дресот со број 93 и тоа, се разбира, не е случајно. Во 93. минута го постигна својот славен гол во финалето на Лигата на шампионите против Атлетико Мадрид, со што изедначи, а потоа Реал Мадрид победи со 4-1 во продолжението и го зграпчи трофејот.

Според пишувањата на медиумите, годишната плата на Рамос во Монтереј ќе биде 4 милиони евра.

Рамос нема да биде единствениот Шпанец во „сино-белиот“ состав. Тој ќе биде соиграч со Серхио Каналес и Оливер Торес. Тимот вклучува и други познати имиња, вклучувајќи ги Лукас Окампос и Хесус Корона.

По 5 одиграни кола во мексиканскиот шампионат, Монтереј е на 10. позиција со 6 бодови. дс

Фото: Принтскрин