Белград, 12 ноември 2025 (МИА) - Во Белград денеска беше отворен Euronews Adria Summit каде српскиот премиер Ѓуро Мацут, рече дека Србија е „многу блиску“ до членство во ЕУ, но дека клучната пречка се политичките одлуки на земјите-членки.

„Технички во секоја смисла ги исполнивме сите услови за да бидеме во Европа, но останува одлуката на земјите-членки ние да им пристапиме“, рече тој,
На прашањето за извештајот на ЕК, Мацут вели дека тој може да се протолкува како критика, но потсетува дека Србија „направила важни чекори“ и дека во последните месеци „се забрзала“ во спроведувањето на реформите, кои, како што истакнува, Владата ќе продолжи да ги презема.

„Постои одредена дисонанца во парламентот и мислам дека не треба да бараме политички поени за овие прашања, ова се прашања од национален интерес. Ако сакаме Европа во Србија, треба што е можно поскоро да ги исполниме тие стандарди и да поставиме услови на нашата политичка сцена за да нема разлики во ова разгледување“, рече Мацут.

Претседателката на Народното собрание на Србија, Ана Брнабиќ, истакна дека стратешка цел на државата е да стане полноправна членка на ЕУ. Таа додаде дека стратешки интерес за целиот Западен Балкан е да биде дел од ЕУ.

„Стратешката цел на Србија е да стане полноправна членка на ЕУ, а тоа повторување стана политичка фраза што не значи ништо, а ние ретко се прашуваме зошто сакаме да бидеме дел од ЕУ и дали сакаме целиот Западен Балкан да биде дел од ЕУ“, рече Брнабиќ.

Таа истакна дека постојат три важни причини зошто Србија треба да стане членка на ЕУ, нагласувајќи дека, без оглед на се што може да се обвини за таа заедница, ЕУ е несомнено најголемиот и најуспешниот мировен проект во историјата на човештвото.

„ЕУ во голема мера го донесе најдолгиот мир и таков мир на европскиот континент што е тешко да се замисли дека земјите-членки на ЕУ биле смртни непријатели. Западниот Балкан мора да биде дел од таков мировен проект за да се сврти кон иднината“, рече Брнабиќ.

Главните теми на првиот „Euronews Adria Summit“ се геополитичките предизвици, подготовките за Експо 2027, економските прогнози за следната година, односот меѓу медиумите и политиката, дипломатските перспективи и чекорите кон европска интеграција. Посебни сесии се - еден на еден со премиерот на Србија Ѓуро Мацут, панел-дискусија за економијата „Money Never Sleeps“, како и завршни дискусии за ЕУ ​​и Западен Балкан.

Меѓу учесниците се премиерот на Србија, Ѓуро Мацут, министерот за надворешни работи на Србија, Марко Ѓуриќ, амбасадорот на Унгарија Јожеф Маѓар, директорот на Ер Србија Јиржи Марек, советникот на директорот на Експо 2027 Душан Боровчанин, претставници на бизнис и регионални медиуми.

Конференцијата е организирана од медиумската компанија Euronews Serbia, чија цел е да ја претстави својата регионална мрежа, која, покрај студиото во Белград, сега ги вклучува и Босна и Херцеговина со седиште во Сараево и Euronews Montenegro со седиште во Подгорица.

Следната година се планира да им се придружи и Euronews Северна Македонија.

Според организаторите, оваа конференција треба еднаш годишно да биде платформа за размена на мислења за најважните теми од интерес за граѓаните, медиумите, како и економските и политичките елити во регионот. зш/
фото принтсктрин Јуроњуз Србија