Софија, 26 ноември 2025 (МИА/БТА) – Во областа на Јужниот залив на островот Ливингстон, меѓународниот тим научници, со помош на логистичкиот тим на експедицијата, собира примероци за неколку научни проекти. Станува збор за биолози од Соединетите Американски Држави, кои работат во областа на екофизиологијата на морските цицачи – д-р Емили Спароу и докторантот Ариел Лихи. Тие земаат примероци од различни видови фоки, но главен предмет на нивното истражување е леопардската фока, за која многу малку се знае на глобално ниво.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

Доц. д-р Симона Георгиева од Институтот за биодиверзитет и студии на екосистеми при Бугарската академија на науките (IBES-BAS) собира примероци од различни ’рбетни и безрбетни организми за да ја проучи разновидноста на паразитите во екстремните живеалишта и да ги открие нивните животни циклуси.

Д-р Борислава Маргаритова од Софискиот универзитет ја проучува концентрацијата и дистрибуцијата на тешки метали во ткивата на антарктичките риби.

Португалските морски еколози – проф. Хозе Ксавиер и главниот помошник д-р Хозе Секо, истражуваат загадувачи и патогени кои предизвикуваат болести кај птиците на Антарктикот. Теренската работа и обработката на примероците во лабораторијата на бугарската база продолжуваат.

На крајот на декември се очекува да пристигнат научници од бугарски и меѓународни тимови со бугарскиот истражувачки брод „Св. Кирил и Методиј“ NIK 421, кои ќе работат во различни научни области, објави БАИ на почетокот на месецот. Тој отплови кон Ледениот континент на 7 ноември од Варна.

Како што објави БТА, првата група од 34-та бугарска антарктичка експедиција тргна кон Ледениот континент на 6 ноември со лет од Софија.

За време на тековната поларна експедиција и четвртото патување со истражувачкиот брод „Св. Кирил и Методиј“, ќе стапнеме и на Антарктичкиот Полуостров, изјави проф. Христо Пимпирев на 7 ноември во Варна при испраќањето на НИК 421 на новото патување.

_______________________________________________________________________________________________________________________________________________

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.