Ерусалим, 11 мај 2026 (МИА) - Израелската главна јавна обвинителка Гали Бахарав-Мијара ја оцени како невалидна одлуката на премиерот Бенјамин Нетанјаху да го назначи генерал-мајорот Роман Гофман за иден шеф на разузнавачката служба Мосад.

Според неа, фундаментално бил нарушен процесот за назначувањето со сериозни пропусти во работата на Консултативниот комитет за високи именувања и во фактичката основа врз која се темели одлуката.

Бахарав-Мијара пред Врховниот суд на Израел наведе дека таквите недостатоци се доволни за поништување на одлуката на премиерот.

Комитетот за високи именувања со мнозинство гласови донесе одлука Гофман да биде назначен за шеф на израелското разузнавање, функција со петгодишен мандат, на која треба да стапи на 2 јуни.

Позицијата на јавната обвинителка наиде на остри реакции од сојузниците на Нетанјаху. Министерот за национална безбедност Итамар Бен-Гвир ја обвини Бахарав-Мијара дека „дејствува против државата Израел“ и додаде дека „во Техеран ја поздравуваат“ нејзината позиција, а Гофман се „бори против непријателот“. аб/сд

фото/МИА архива