Конститутивна седница на Советот на Општина Кисела Вода, за претседател избрана Светлана Колариќ

Скопје, 5 ноември 2025 (МИА) - На денешната конститутивна седница на новиот состав на Советот на Општина Кисела Вода беа верификувани мандатите на новоизбраните 27 советници и за претседател на Советот беше избрана Светлана Колариќ.

Како што информира Општина Кисела Вода, во своето обраќање Колариќ истакна дека изборот ја обврзува уште посилно да работи во интерес на граѓаните и да го унапреди демократскиот дијалог во рамки на Советот.

-За мене е чест повторно да свикувам и раководам со седниците, да се грижам за организацијата и работата на Советот и директно да учествувам во носењето акти од чија имплементација зависи одвивањето на процесите во нашата заедница. Од овде испраќам јасна порака до вас и до граѓаните - Советот не е место за политички натпревари, туку за носење на цврсти и одговорни одлуки со кои го креираме нашето секојдневие и се грижиме за нашите сограѓани. Од нашите одлуки зависи дали ќе се изгради или реконструира градинка, училиште, спортски објект, културен или младински дом, дали ќе се прошируваат и подобруваат мрежите за водоснабдување и канализација, уличното осветлување, зеленилото и урбаниот соживот. Впрочем, тоа е суштината на локалната власт: да се реализираат конкретни проекти, да се донесат видливи резултати и домаќински да се користат буџетските средства. Секој од нас е гласот на својата заедница и токму во тоа е силата на децентрализацијата- одлуките да се носат во дослух со граѓаните и врз основа на нивните потреби, Колариќ.

Таа истакна дека новоизбраната градоначалничка има силен легитимитет од граѓаните, остварена победа уште во првиот круг и дека Советот ќе соработува одговорно со неа во интерес на општината.

На седницата се обрати и новата градоначалничка на Општина Кисела Вода Бети Стаменкоска Трајкоска.

-Силно верувам дека од денес па во наредните четири години ќе бидеме обединети околу она што ни е заедничко, а тоа е интересот на граѓаните. Само така, со заедничка сила, со меѓусебна почит и конструктивна соработка, можеме да ја движиме нашата општина напред. Советот е срцето на локалната демократија, гласот на жителите од сите населби и населени места во Општина Кисела Вода. Вие сте нивниот глас, нивната енергија и нивната надеж дека решенијата се можни, ако сите се залагаме искрено и посветено. Како градоначалничка, мој приоритет ќе биде јасен, да ја реализирам програмата што ја ветивме, со целосен фокус на потребите на жителите. Верувам во партнерство, во дијалог и во заедништво, изјави градоначалничката Стаменкоска-Трајкоска.

Нека оваа конститутивна седница, како што порача, биде симбол на нов почеток – почеток на соработка, разбирање и заемна поддршка.

- Да покажеме дека можеме да ги надминеме разликите и да се обединиме во целта – да ја направиме Кисела Вода место на кое секој ќе биде горд што живее. Ви посакувам успешна и плодна работа. Нека овој Совет биде пример на зрелост, мудрост и визија. Јас, како ваша градоначалничка, ветувам дека ќе бидам отворена за секој предлог, подготвена за секоја соработка и посветена на секој граѓанин, изјави Стаменкоска-Трајкоска.

Во новиот состав има 17 советници од коалицијата предводена од ВМРО-ДПМНЕ, пет од Левица, четворица од СДСМ и еден од партијата ЗНАМ. Советот брои 17 мажи и 10 жени, претставници на различни професии и генерации.

Состав на Советот на Општина Кисела Вода (мандат 2025–2029):

ВМРО–ДПМНЕ и коалициски партнери:

Светлана Колариќ
Николче Николовски
Сашо Андонов
Елизабета Брсакоска–Георгиевска
Антонио Десковски
Петар Младеновски
Зорица Огненовска
Билјана Стојановска
Бојан Димковски
Златко Костадиновски
Марија Атанасова
Бранислав Зукиќ
Драган Василевски
Љубиша Спасовски
Мануелка Ивановска
Христос Папули
Пецо Долевски
Левица:
18. Донче Мишовски
19. Петар Здравевски
20. Маја Дургутова
21. Љубиша Петровски
22. Давид Бошковски